Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 598 Hüküm no: 540 Orijinal metin no: [175a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülahmer Hatun bt. Abdülmennan’ın vakfiyesi Mâ-rukime fîhi ve rusime fî-metâvîhi min-asli’l-vakfi ve şürûtihî ve zavâbitihî ve kuyûdihî tehakkaka küllühû ledeyye ve tebeyyene cemî‘uhû beyne yedeyye ve innî kazaytü bi-sıhhatihî ve lüzûmihî fî-husûsihî ve umûmihî âlimen bi’l-hilâfi’l-cârî beyne’l-eimmeti’l-eşrâf ve ene’l-fakīr ileyhi te‘âlâ Mehmed b. Derviş el-müvellâ bi-medîneti Galata el-mahmiye hilâfeten -ufiye anhümâ- Elhamdülillâhi’l-vâkıfü alâ-külli hâl âlimü’l-gaybi ve’ş-şehâdeti el-kebîrü’l-müte‘âl ve’s-salâtü ve’s-selâmü alâ-resûlihî Muhammedin ve alâ-âlihî ve ashâbihi’l-kirâm ammâ ba‘d. İşbu mazmûnunda vakıf ikrârından bahsedilen sahîh ve şer‘î bir hüccettir. Hâric-i mahmiye-i Galata mahallâtından Müeyyedzâde mahallesinde sâkine sâhibetü’l-hayrât ve’l-hasenât Gülahmer Hatun bt. Abdülmennan meclis-i şer‘-i şerîfe hâzır olup âti’z-zikr vakfına tescîl maksadıyla mütevellî nasbettiği Derviş Çelebi b. Mehmed nâm kimse mahzarında şöyle ikrâr ve i‘tirâf etti ki, işbu vakıf ikrârının kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede vâki‘, tahtânî ve fevkānî birer bâb hâneyi, su kuyusunu, kenîfi ve muhavvatayı hâvî, hudûdu bir tarafından Şükrullah Reis b. Mehmed mülkü, bir tarafından Âişe Hatun bt. Abdullah mülkü, bir tarafından Mihriban Hatun bt. ( ) Vakfı, bir tarafından tarîk-ı hâs ile mahdûd bulunan cemî‘ menzilini cümle tevâbi‘i ve levâhıkıyla niyet-i sâfiye ve taviyyet-i vâfiye üzere habs ve vakfetti. Menzil-i mezbûrda süknâyı mâdâm ki hayâtda ola evvelâ nefs-i nefîsesine, ba‘de vefâtihâ Rıdvan b. Abdullah nâm mu‘takına ve Kamer bt. Abdullah nâm mu‘takasına şart etti. Sonra bunların evlâdına, evlâd-ı evlâdına, ile’l-inkırâz evlâd-ı evlâd-ı evlâdına şart etti. Ba‘de inkırâzi’l-kül Medîne-i münevvere fukarâsına şart etti. Vâkıfe-i mezbûre sonra menzil-i mezkûru mütevellî-i mezkûra teslîm etti. O dahi tesellüm edip sâir mütevellîler evkāfda nasıl tasarruf ettiler ise öyle tasarruf eyledi. Mütevellî-i mezbûr vâki‘ ikrârı vicâhen ve şifâhen tasdîk etti. Emr-i vakf-ı mezbûr vech-i mastûr üzere tamâm olduğunda vâkıfe-i mezkûre İmâm-ı a‘zam Ebû Hanîfe katında vakfın adem-i lüzûmuna mütemessiken vakfiyyetten rücû‘ edip menzilin mülk-i sahîhine ilhâkını talep ve istirdâd eyledi. Mütevellî, imâmeyn-i hümâmeynin re’ylerine tevfîkan redden imtinâ‘ edince hâkim-i muvakki‘ü’l-kitâb huzûrunda murâfa‘a edip tarafeynden hüküm taleb ettiklerinde hâkim-i mûmâ-ileyh, cânib-i vakfı ihtiyâr edip menzil-i merkūmun vakfiyetinin lüzûmuna -âlimen bi’l-hilâf beyne’l-eimmeti’l-eşrâf- hükmetmekle vakf-ı mezbûr müseccel, müebbed bir vakıf olarak bi’l-ittifâk evkāf-ı lâzimeden oldu. Fe-men beddelehû ba‘de mâ-semi‘ahû fe-innemâ ismühû ale’llezîne yübeddilûnehû inna’llâhe semî‘un alîm. Ve ecrü’l-vâkıfe ale’l-hayyi’l-cevâdi’l-kerîm. Cerâ zâlike ve hurrire fî-evâili Saferi’l-hayr li-sene erba‘a aşere ve elf min-hicreti men lehü’l-izzü ve’ş-şeref. Şühûdü’l-hâl: Hasan Halîfe b. Ramazan, Abdurrahman b. Ramazan, Hasan Bey b. Hasan, Hüseyin b. Ahmed el-kayyım, Abdullah Reis b. Mehmed, el-Hâc Yahya b. Ali, Davud b. Abdullah, el-Hâc Bahâeddin b. Ali, el-Hâc Memi b. Abdullah