Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 601 Hüküm no: 542 Orijinal metin no: [176a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirin bt. Abdullah tarafından vakfedilip Haremeyn Evkafı’na intikal eden vakıf evin el-Hac Mehmed b. Ahmed’e kiraya verilmesi Dârü’l-hilâfeti’l-aliyye Kostantıniyyetü’l-mahmiye’de vâki‘ Haremeyn-i Şerîfeyn Evkāfı’na mütevellî olan fahrü’l-emâcid ve’l-ekârim İsmail Ağa b. Abdüddâim meclis-i şer‘-i şerîf-i lâzımü’t-tevkīrde işbu hâfifzü’l-kitâb el-Hâc Mehmed b. Ahmed nâm kimesne muvâcehesinde ikrâr-ı tâm ve takrîr-i kelâm edip mahmiye-i mezbûre mahallâtından merhûm ve mağfûrün-leh Sultân Selim Hân -aleyhi’r-rahmetü ve’l-gufrân- hazretleri mahallesi sâkinelerinden olup bundan akdem vefât eden sâhibetü’l-hayrât ve’l-hasenât Şirin bt. Abdullah nâm müteveffât tasarrufunda olup Meryem bt. Mehmed ve Mi‘mâr Şa‘ban ve Mazlum Bey mülkleriyle mahdûd olup üç bâb beyt-i ulvîyi ve sofa ve dahlîzi ve bir bâb beyt-i süflîyi ve sofayı ve bi’r-i mâ ve fırını ve hadîka ve eşcâr-ı müsmire ve gayr-ı müsmireyi ve kenîf ve muhavvatayı müştemil olan menzilini vakf ve evvelâ süknâsını kendüye şart edip ba‘dehâ Güncihan nâm Hatuna ba‘dehâ evlâdına ba‘de’l-inkırâz Haremeyn-i Şerîfeyn fukarâsına şart ve ta‘yîn ettiği vakfiye-i ma‘mûlün-bihâsında mastûr ve mukayyed olup hâlâ meşrûtün-aleyhâ evlâdlar bi’l-külliye münkarız olmağın menzil-i merkūm cânib-i vakf-ı şerîfe intikāl edip vech-i âtî üzere îcâr olunmak lâzım olmağın beyne’t-tâlibîn müzâyede olunup ragabât-ı nâs inkıtâ‘ındnan sonra elli beş bin nakd-i râyic fi’l-vakt akçe icâre-i mu‘accele ve yevmî bir akçe icâre-i müeccele ile mezbûr el-Hâc Mehmed üzerinde karâr edip ziyâde ile tâlib-i âhar zuhûr etmeyip ve meblağ-ı merkūm ecr-i misli idiği müte‘ayyen olmağın ben dahi tevliyyetim hasebiyle menzil-i merkūmu tevâbi‘i ile vech-i merkūm üzere elli beş bin akçe icâre-i mu‘accele ve yevmî bir akçe icâre-i müecccele ile mezbûr el-Hâc Mehmed îcâr edip ol dahi istîcâr ve kabûl ettikden sonra icâre-i mu‘accelesi olan mezbûrü’n-na‘t elli beş bin akçe taraf-ı vakıf için yedinden bi’t-tamâm ahz u kabz ettim, ba‘de’l-yevm icâre-i müeccelesi olan yevmî bir akçeyi cânib-i vakf-ı merkūma edâ ettikden sonra menzil-i merkūma keyfe mâ yeşâ mutasarrıf olur dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu ve terkīm olunup yed-i tâlibe vaz‘ olundu. Fi’l-yevmi’s-sâlis min-evveli rebî‘ayn. Şühûdü’l-hâl: Abdülhalim [b.] Hüseyin el-müderris, Hasan Çelebi [b.] Hüseyin Mi‘mâr, Ali Çelebi b. ( ) el-mi‘mâr, Ali Bey b. Abdullah el-bevvâb.