Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 602 Hüküm no: 543 Orijinal metin no: [176a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Vakfı mütevellisi İsmail Çelebi’nin Gülahmer bt. Abdullah tarafından vakfedilen evi teslim alması Haremeyn mütevellîsi İsmail Çelebi b. Mehmed meclis-i şer‘de takrîr-i kelâm edip mahmiye-i Galata’da kasaba-i Tophane’de Müeyyedzâde mahallesinde sâkine sâhibetü’l-hayrât Gülahmer bt. Abdullah hâl-i hayâtında mahalle-i mezbûrede vâki‘ bir tarafdan Şakir Reîs mülkü ve bir tarafdan Âişe Hatun mülkü ve bir tarafdan Mihriban Hatun Vakfı ve bir tarafdan tarîk-i âm ile mahmud menzilini vakf edip süknâsını evvelâ nefsine ba‘dehû mu‘takı Rıdvan b. Abdullah’a ba‘dehû mu‘tekası Kamer bt. Abdullah’a ba‘dehâ mezbûrânın evlâdlarına ba‘de’l-inkırâz Medîne-i Münevvere fukarâsına şart edip meşrûtün-lehüm bi’l-külliye münkarız olmağla menzil-i mezbûrun hakk-ı tasarrufu vakf-ı mezbûra âid olmuşdur, cânib-i şer‘den üzerine varılıp mu‘âyene ve mesâha olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ıyla tûlen on yedi ve arzen dokuz bi-hesâb-ı şatrancî yüz elli üç zirâ‘ arsa üzerine mebnî bir beyt-i süflî ve beyt-i ulvî ve bi’r-i mâ ve kenîf ve muhavvatayı müşâhede eylediklerinde mevlânâ-yı mezbûr mahallinde tahrîr ba‘dehû gelip meclis-i şer‘de inhâ etmeğin mâ-vaka‘a bi’t-taleb ketb olundu. Tahrîren fî-evâili Safer li-sene tis‘a ve selâsîn ve elf. Şühûdü’l-hâl: İsmail Çelebi, el-Hâc Ramazan, Mirza Bey b. Kemal, Şa‘ban b. Ahmed, Derviş b. Mustafa.