Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 603 Hüküm no: 545 Orijinal metin no: [176b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Noktacıbaşı Cafer Ağa Vakfı ile Haremeyn Evkafı’na ait evin Dergah-ı Âlî müteferrikalarından Murad Ağa b. Ramazan’a kiraya verilmesi Medîne-i Ebî Eyyüb el-Ensârî -aleyhi rahmetü’l-bârî-’de vâki‘ Noktacıbaşı merhûm Ca‘fer Ağa b. ( ) Vakfı’na mütevellî olan Hüsameddin Halîfe b. Abdurrahman nâm kimesne meclis-i şer‘-i şerîf-i lâzımü’t-tevkīrde bundan akdem sadrâzam iken vefât eden merhûm Ali Paşa hazretlerinin sulbî oğlu olup Dergâh-ı Âlî müteferrikalarından olan fahrü’l-emâcid ve’l-ekârim hâfızü hâze’l-kitâb Mehmed Ağa tarafından husûs-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan fahrü’l-akrân Murad Ağa b. Ramazan mahzarında ikrâr edip Dârü’l-hilâfeti’l-aliyye’de Kasımpaşa-yı Cezerî mahallesinde vâki‘ bir tarafı Haydar b. Abdullah mülkü ve bir tarafı İlyas Dede Zâviyesi ile ve bir tarafı tarîk-i hâs ve taraf-ı âharı tarîk-i âm ile mahdûd olup muhavvata-i dâhiliyyesi bir bâb beyt-i süflî ve bir matbahı ve fevkinde iki bâb beyt-i ulvî ve hamâmı ve bi’r-i mâ ve kenîfi müştemil olup ve muhavvata-i hâriciyyesi bir bâb beyt-i süflî ve bir ahırı ve üzerinde iki bâb fevkānî odaları ve kenîfi müştemil olup Telhîsci Oruç Ağa’nın icâre-i mu‘accele ve müeccele ile tasarrufunda olan menzilin nısfı vakf-ı mezbûrdan ve nısf-ı âharı Haremeyn-i Şerîfeyn Evkāfı’ndan olmağın mezbûr Oruç Ağa vefât ettikde menzil-i merkūm vakfeyn-i merkūmeyn tarafına âid olup ba‘de’l-müzâyede seksen bin akçe icâre-i mu‘accele ve beher vakıf tarafına yevmî ikişer akçe icâre-i müeccele ile mezbûr Murad Ağa’nın müvekkili mûmâ-ileyh Mehmed Ağa üzerinde karâr ve îcâr olundukdan sonra mebâliğ-i mezbûrdan kırk beş bin akçesini Haremeyn-i Şerîfeyn tarafından ve otuz beş bin akçesini merhûm Ca‘fer Ağa Vakfı için ahz u kabz edip temessük vermişdik, lâkin mezbûr Oruç Ağa’nın veledi zuhûr edip mersûm Mehmed Ağa menzil-i mezbûru veledinden olmağın vakf için kabz olunan otuz beş bin akçenin edâsı lâzım gelip vakıfda vüs‘at olmamağın mukābele-i meblağ-ı mezbûrda icâre-i müeccelesi olan yevmî ikişer akçenin bir akçesini def‘ edip bâkī bir akçe icâre ta‘yîn eyledim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb olundu. Fi’l-yevmi’l-hâmis aşer min-evveli’r-rebî‘ayn li-sene selâse ve selâsîn ve elf. Şühûdü’l-hâl: Abdülhalim Çelebi el-müderris, Hasan Çelebi b. Hüseyin Mi‘mâr, Ali Çelebi b. Halil Mi‘mâr, Ali Bey b. Abdullah el-bevvâb.