Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 604 Hüküm no: 546 Orijinal metin no: [176b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Ağa b. Mehmed Çelebi’nin Emine bt. Abdülmennan tarafından vakfedilen evi teslim alması Budur ki, Dârü’l-hilâfeti’l-aliyye Kostantıniyyetü’l-mahmiye’de Haremeyn Evkāfı’na mütevellî olan fahrü’l-akrân İsmail Ağa b. Mehmed Çelebi meclis-i şer‘-i şerîf-i lâzımü’t-tevkīre gelip takrîr-i kelâm edip mahmiye-i mezbûre mahallâtından Ayasofya kurbünde mahalle-i Cedîd sâkinelerinden olup bundan akdem vefât eden sâhibetü’l-hayrâtdan Emine bt. Abdülmennan nâm hatun tasarrufunda olan emlâkinden mahalle-i mezbûrede vâki‘ bir taraf Sarây-ı Cedîd duvarı ile ve bir tarafı Mustafa Bey b. Abdi mülkü ile ve bir tarafı Veli Bey mülkü ile ve taraf-ı râbi‘i tarîk-i âm ile mahdûd olan menzilini vakf edip süknâsını evvelâ kendüye ba‘dehâ anası Kamer Hatun’a ba‘dehâ Medîne-i Münevvere fukarâsına şart ve ta‘yîn ettiği vakfiyesinde mastûr olmağın hâlâ mezbûre Kamer Hatun dahi vefât edip menzil-i merkūmun tasarrufu cânib-i vakf-ı şerîfe âid olmuşdur, savb-ı şer‘den üzerine varılıp mâ-vaka‘a keşf ve terkīm olunmak matlûbumdur dedikde kıbel-i şer‘den Mustafa Efendi irsâl olunup ol dahi mi‘mârân-ı hâssadan Hasan Çelebi b. Hüseyin ve zeyl-i kitâbda mastûrü’l-esâmî olan Müslimîn ile menzil-i mezbûrun üzerine varıp müşâhede ve mesâha ettiklerinde tûlen on bir zirâ‘ yirmi bir buçuk parmak ve arzen dokuz buçuk zirâ‘ bi-hesâb-ı şatrancî bennâ zirâ‘ı ile yüz on iki zirâ‘ arsa üzerinde mebnî bir beyt-i ulvî ve bir beyt-i süflî ve bir dahlîz ve kenîfi müştemil olduğunu mevlânâ-yı mezbûr mahallinde tahrîr edip ba‘dehû meclis-i şer‘de haber verdikden sonra mâ-hüve’l-vâkı‘ bi’t-taleb ketb olundu. Fi’l-yevmi’s-sâmin aşer min-evveli’r-rebî‘ayn sene tis‘a ve selâsîn ve elf. Şühûdü’l-hâl: Mustafa Bey b. Abdi, Receb Bey b. İsmail, Mustafa Bey b. Abdülmennan, Ömer b. Abdülmennan, Ali Bey b. Abdülmennan ve gayruhüm.