Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 604 Hüküm no: 547 Orijinal metin no: [177a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ramazan’ın kiracısı olduğu Haremenyn Evkafı’na ait evin yanması üzerine evi kendi parasıyla yeniden yaptırması Mahrûsa-i Kostantıniyye mahallâtından Elvanzâde mahallesi sâkinlerinden hâfızü’l-kitâb Hüseyin b. Ramazan nâm kimesne meclis-i şer‘-i şerîf-i lâzımü’t-tevkīre gelip takrîr-i kelâm edip mahrûsa-i mezbûrede Haremeyn-i Şerîfeyn Evkāfı’ndan mahalle-i merkūmede vâki‘ lede’l-ahâlî ve’l-cîrân ma‘lûmü’l-hudûd olup icâre-i mu‘accele ve beher şehr yetmiş beş akçe ücret-i müeccele ile mutasarrıf olduğum menzil bundan esbak bi’l-külliye muhterik olup cânib-i vakıfdan müceddeden binâya vüs‘at olmamağın mâlımdan binâsına sarf ettiğim akçe icâre-i mu‘acceleme mahsûb olmak üzere mukaddemâ binâsına me’zûn olduğum ecilden hâlâ müceddeden binâ etmişimdir, cânib-i şer‘den üzerine varılıp harc u sarf ettiğim meblağın mertebe-i tahammülü tahmîn ve ecr-i misli takvîm olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi mi‘mârân-ı hâssadan Ali Çelebi b. Halil nâm ve zeyl-i kitâbda mastûrü’l-esâmî olup ebniye ve sukūfa vukūfu olan Müslimîn ile menzil-i merkūmun üzerine varıp müşâhede ve evkāf-ı mezbûre mütevellîsi fahrü’l-ekârim İsmail Çelebi mahzarında mesâha ettiklerinde bennâ zirâ‘ı ile tûlen yirmi iki buçuk zirâ‘ ve arzen yedi buçuk bi-hesâb-ı şatrancî yüz altmış sekiz zirâ‘ arsa üzerine mebnî menzilin bi-hesâb-ı mezbûr yüz beş zirâ‘ sakfının her zirâ‘ı ellişer akçeden beş bin iki yüz elli akçe ve yüz otuz altı zirâ‘ döşemenin her zirâ‘ı ellişer akçeden altı bin sekiz yüz akçe ve yüz otuz sekiz zirâ‘ dolma duvarın her zirâ‘ı yirmi beşer akçeden üç bin üç yüz elli akçe ve nıkzı ile mebnî yirmi sekiz zirâ‘ taş duvarın her zirâ‘ı otuzar akçeden sekiz yüz kırk akçe ve taş ve kireç ile mebnî otuz üç zirâ‘ duvarın her zirâ‘ı yirmi beşer akçeden dokuz yüz otuz yedi akçe ve on bir zirâ‘ tahta perdenin her zirâ‘ı kırkar akçeden dört yüz kırk akçe ve üç penceresine dört yüz seksen akçe ve bir kenîf altı yüz akçe ve bir nerdübânına üç yüz akçe ve otuz zirâ‘ tavanının her zirâ‘ı boyası ile kırkar akçeden bin iki yüz akçe ve ve dört billûr camına bin akçe ve iki ocağına sekiz yüz akçe ve bir masandrasına dört yüz akçe cem‘an sarfının yirmi iki bin üç yüz doksan yedi akçeye tahammülü olup noksân ile binâ mümkün olmadığını ve ecr-i mislinin otuz sekiz akçeden ziyâdeye tahammülü olmadığını mi‘mâr-ı merkūm tahmîn-i sahîh ile tahmîn edip haber verdiğini mevlânâ-yı mezbûr mahallinde tahrîr edip ba‘dehû meclis-i şer‘de gelip inhâ ve takrîr ettikden sonra meblağ-ı mezbûr icâre-i mu‘accelesine mahsûb olup ve ücret-i müeccelesi otuz sekiz akçe olmak üzere mâ-hüve’l-vâkı‘ bi’t-taleb ketb olundu. Fî-evâili Muharremi’l-harâm li-sene tis‘a ve selâsîn ve elf min-hicreti men lehü’l-izzü ve’ş-şeref. Şühûdü’l-hâl: Mustafa Çelebi Kâtib-i vakf, diğer Mustafa Çelebi Kâtib-i vakf, Edhem Çelebi b. Demir el-câbî, İsmail Çelebi b. Mahmud, Ahmed b. Dede Hüseyin, Müstedâm b. Abdülmennan, Mehmed b. Lütfi, Abdülgani b. Hüseyin, İsa b. Mustafa ve gayruhüm.