Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 605 Hüküm no: 548 Orijinal metin no: [177a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Beşe b. Abdullah’ın kiracısı olduğu Haremenyn Evkafı’na ait evin yanması üzerine evi kendi parasıyla yeniden yaptırması Mahmiye-i İstanbul’da Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde bâ‘isü hâze’l-kitâb Hüseyin Beşe b. Abdullah mahzarında ikrâr-ı tâm ve takrîr-i kelâm edip evkāf-ı mezbûreden olup mahmiye-i mezbûre mahallâtından Gıyaseddin mahallesinde vâki‘ lede’l-ahâlî ma‘lûmü’l-hudûd menzil ayda otuz akçe icâre-i müeccele ve icâre-i mu‘accele ile mezbûr Hüseyin Beşe’nin taht-ı icâresinde iken bi’l-külliye muhterik olup cânib-i vakıfdan müceddeden binâya müsâ‘ade olmamağla beher şehr mu‘ayyen olan icâre-i müeccelenin ayda on akçesi tenzîl olunup icâre-i mu‘accelesine mahsûb olmak üzere kendi mâlıyla müceddeden binâya mezbûr Hüseyin Beşe’ye izin verdim dedikde mütevellî-i mezbûru ikrâr-ı meşrûhunda el-mukırru lehü’l-mersûm Hüseyin Beşe vicâhen tasdîk ve şifâhen tahkīk idecek mâ-hüve’l-vâkı‘ gıbbe’t-taleb ketb olundu. Tahrîren fî-evâsıtı Cemâziyelâhire li-sene tis‘a ve selâsîn ve elf min-hicreti men lehü’l-izzü ve’l-şeref. Şühûdü’l-hâl: Mustafa Çelebi Kâtib-i vakf-ı mezbûr, diğer Mustafa Çelebi Kâtib-i vakf-ı mezbûr, Ali Çelebi b. Hızır el-câbî, Dilaver Bey b. Abdullah el-câbî, Ali Çelebi b. Halil el-mi‘mâr, Abdullah Çelebi b. Rıdvan, Ali Bey b. Abdullah el-bevvâbü’s-sultânî, Hasan Beşe b. Abdullah ve gayruhüm.