Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 108 Hüküm no: 31 Orijinal metin no: [4b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Efendi b. Ahmed’in, el-Hâc Nuh b. Yusuf’a emanet verdiği Kur’ân-ı Kerîm’in kaybolduğu Mahmiye-i İstanbul’da Pîrî Paşa hanı’nda sâkin Hasan Efendi b. Ahmed nâm kimesne mahfil-i kazâda işbu bâ‘isü’l-kitâb el-Hâc Nuh b. Yusuf nâm kimesne mahzarında üzerine da‘vâ ve takrîr-i kelâm edip târih-i kitâbdan sekiz ay mukaddem gāib ani’l-meclis Ahmed Çelebi b. Mustafa’ya bi tarîki’l-vedî‘a bir Kelâm-ı izzetimi vaz‘ ve teslîm etmişidim, mezbûr Ahmed Çelebi dahi merkūm el-Hâc Nuh’a bi tarîki’l-vedî‘a bana teslîm etmek üzre vaz‘ ve teslîm etmekle mezbûr Kelâm-ı izzet suâl olunup alıverilmesi matlûbumdur dedikde, gıbbe’s-suâl mezbûr el-Hâc Nuh cevâbında kaziyye minvâl-i muharrer üzre olduğunu ikrâr edip lâkin mezbûr Kelâm-ı izzet odamdan ba‘zı eşyâlarımla zâyi‘ oldu demekle mezbûr el-Hâc Nuh bu husûsda emîn olup yemîn ile müsaddak olmağın mezbûr Kelâm-ı izzeti âhara bey‘ ve hibe etmeyip bir vechile te‘addî etmediğine yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebince mezbûr Hasan Efendi bî-vech mu‘ârazadan men‘ olunup mâ vaka‘a ketb olundu. Fi’l-yevmi’s-sâlis ve’l-ışrîn min Rebî‘ilâhir sene [10]77 Şuhûdü’l-hâl: Şükrullah Bey b. Mustafa, İbrahim Çelebi [b.] Ahmed, Abdi Çelebi [b.] Hüseyin, Resul b. Rıdvan