Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 607 Hüküm no: 550 Orijinal metin no: [178a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Koyuluhisarı halkından olup Fındıklı’da boğularak ölen Mehmed b. Cafer’in terekesini kardeşi Ali b. Cafer’in teslim alması Vilâyet-i Anadolu’da Koyuluhisarı sâkinlerinden olup mahrûsa-i İstanbul’da Sarây-ı Cedîd-i Sultânî -dâme medâru’l-emn ve’l-emânî-’de sâkin helvacıyândan olup mahrûsa-i Galata tevâbi‘inden Fındıklı demekle ma‘rûf mahalde garîk-i bahr olan Mehmed b. Ca‘fer nâm müteveffânın li-ebeveyn karındaşı ve bi’l-inhisâr vârisi olduğu nehc-i şer‘î üzere sâbit olan Ali b. Ca‘fer nâm kimesne meclis-i şer‘-i şerîf-i lâzımü’t-tevkīrde müteveffâ-yı mezbûr Mehmed’in alâ-tarîkı’l-emâne muhallefâtına vâzı‘ü’l-yed olup Dârüssaâdeti’s-seniyye ağası olan umdetü’l-havâs ve’l-mukarrebîn mu‘temedü’l-mülûk ve’s-selâtîn zü’l-kadri’l-aliyyi ve’s-şâni’l-celî el-mahfûfu bi-sunûfi avâtifi’l-meliki’r-rahîm hazret-i İdris Ağa b. Abdurrahim -dâme me‘âliyehû- hazretleri huzûr-ı âlîlerinde ikrâr edip mahall-i mezbûrede garîkan vefât eden li-ebeveyn karındaşım müteveffâ-yı mezbûr Mehmed’in verâseti bana münhasıra olmağın ağa-yı müşârun-ileyh hazretleri yedinde emâneten mazbût olan esvâbından bir köhne yeşil yağmurluk ve bir yeşil çuka kürdiye ve bir köhne yenlik yağmurluk ve bir munakkaş çuka dolama ve bir kırmızı çakşır ve bir yeşil zıbın ve üç yüzük ve bir köhne kolan kuşak ve bir yeşil mukaddem kuşak ve bir destâr ve bir topuz? ve bir destâr ve otuz altı aded munakkaş makrame ve bir köhne atlas kaftan ve bir mâ’î …? ferâce ve bir köhne yeşil çuka kürdiye ve bir meneviş ferâce ve bir yeşil atlas kaftan ve âteşî kemhâ kaftan ve bir siyâh kadife kaftan ve bir siyâh telli hâre kaftan ve bir atlas zıbın ve köhne kırmızı kadife pâreleri ve bir atîk tesbîh ve bir billûr tesbîh ve on dâne sîm yağmurluk düğmesi ve kettân don ve gömlek ve sâir hurdevât-ı esvâbı bi’l-cümle bana intikāl etmeğin ben dahi verâsetim hasebi ile eşyâ-i merkūmeyi mûmâ-ileyh ağa hazretleri yedinden tamâmen ahz u kabz edip husûs-ı mezbûra müte‘allik da‘vâdan zimmet-i âlîlerinden ibrâ ettim dedikde gıbbe’t-tasdîk vicâhen mâ-hüve’l-vâkı‘ bi’t-taleb ketb u terkīm olundu. Fi’l-yevmi’l-hâmis ve’l-ışrîn min-evveli’l-cemâzeyn li-sene tis‘a ve selâsîn ve elf. Şühûdü’l-hâl: Fahrü’l-emâcid ve’l-ekârim Rıdvan Efendi el-muhâsebeci, zahrü’l-ekârim Süleyman Ağa b. Abdüddâim, fahrü’l-akrân İsmail Bey el-bevvâbü’s-sultânî, Ali Bey b. Abdülmennan ve gayruhüm.