Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 608 Hüküm no: 551 Orijinal metin no: [178a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babüssaâde ağalarından Süleyman Ağa b. Abdülmennan’ın Haremeyn Vakfı’na ait Molova kalesindeki bahçenin kiracısı olduğu Dârü’s-saltanati’s-seniyye Kostantıniyyetü’l-mahmiye’de sâbıkā Bâbüssaâde ağalarından fahrü’l-emâcid ve’l-ekârim hâfızü hâze’l-kitâb Süleyman Ağa b. Abdülmennan meclis-i şer‘-i şerîf-i lâzımü’t-tevkīre gelip takrîr-i kelâm edip merhûm Hızır Çavuş’un Haremeyn-i Şerîfeyn -şerrefehallâhü te‘âlâ fi’d-dâreyn- için vakf eyledikleri evkāfdan cezîre-i Midilli’de nefs-i kal‘a-i Molova’da vâki‘ bir tarafı İlyas Bey bahçesi ile ve bir tarafı Kara Yusuf bahçesi ile ve bir tarafı Burkah zimmî tarlası ile ve taraf-ı âharı tarîk-i âm ile mahdûd olup eşcâr-ı zât-ı müsmire ve gayr-ı müsmireyi müştemil olan vakıf hadîkanın hakk-ı tasarrufunu ba‘de’l-müzâyede sâbıkā Dârüssaâdeti’s-seniyye ağası olup hâlâ Bâbüssaâde ağası olan umdetü’l-havâssı ve’l-mukarrebîn mu‘temedü’l-mülûk ve’s-selâtîn sâhibü’l-izzi ve’t-temkîn İsmail Ağa b. Abdurrahim -dâme me‘âliyehû- hazretleri zamân-ı saâdetlerinde yirmi beş bin akçe icâre-i mu‘accele ve beher sene yüz seksen akçe ücret-i müeccele ile bana îcâr edip ben dahi istîcâr ve kabûl ettikden sonra icâre-i mu‘accelesi olan meblağ-ı mezbûr yirmi beş bin akçeyi vakf-ı merkūm için benden tamâmen ahz u kabz ettikden sonra zabtı için imzâsı ile mümzâ ve hatem ile mahtûm ve bin otuz iki senesi Rebî‘ilevveli’nin gurresi ile müverrah yedime tezkire vermişdir, nazar olunup mûcebince istihkâmen savb-ı şer‘den dahi temessük taleb ederim dedikde fi’l-vâki‘ mûmâ-ileyh Süleyman Ağa’nın yedinde olan tezkiresine nazar olunup mazmûnu takrîrine mutâbık bulunmağın te’yîden işbu hurûf ketb olunup yedine vaz‘ oluna. Fi’l-yevmi’s-sâmin ve’l-ışrîn min-evveli’l-cemâzeyn li-sene tis‘a ve selâsîn ve elf. Şühûdü’l-hâl: Fahrü’l-müderrisîn Çelebi Efendi b. Mehmed Efendi, Halil Efendi b. Mahmud el-müderris, Ali Çelebi b. Halil el-mi‘mâr, Ali Bey b. Abdülmennan el-bevvâbü’s-sultânî ve gayruhüm.