Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 611 Hüküm no: 554 Orijinal metin no: [179b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Abdülmennan’ın tasarrufundaki Ahras Ömer b. Abdülmennan Evkafı’na ait yanan evi yeniden yaptırması Mahrûsa-i İstanbul’da Ahras Ömer b. Abdülmennan Evkāfı’ndan menzil-i âti’l-beyâna meşrûtiyet üzere mutasarrıf olan utekāsından hâfızetü hâze’l-kitâb Emine bt. Abdülmennan nâm hatun tarafından husûs-ı âti’l-beyâna vekîl olup Hasan Bey b. Abdullah ve Mehmed b. Hasan nâm kimesneler şehâdetleri ile şer‘an vekâleti sâbite olan zevci fahrü’l-akrân Mustafa Çavuş b. Kenan meclis-i şer‘-i şerîf-i lâzım-i tevkīrde takrîr-i kelâm edip zevcem müvekkilem mezbûre Emine Hatun’un seyyidi olan merhûm Ömer Ağa hâl-i sıhhatinde tasarrufunda olan emlâkinden mahrûsa-i mezbûre mahallâtından Mimar Kemal mahallesinde vâki‘ iki tarafı Handan Ağa mülkü ile ve iki tarafı vakf-ı mezbûr ve tarîk-i âm ile mahdûd olup ulvî ve suflî büyût-ı müte‘addideyi müştemil olan mülk menzilini cümle tevâbi‘i ile vakf edip dâhiliyyesi süknâsını evvelâ kendüye ba‘dehû mu‘tekası zevcesi mezbûre Emine Hatun’a ba‘de vefâtihâ Haremeyn-i Şerîfeyn fukarâsına şart ve ta‘yîn ettiği menzilin süknâsı mezbûreye âid olmuş iken bundan akdem bi’l-külliye muhterik olup bir vechile kābil-i süknâ olmayıp ve müvekkilem mezbûrenin dahi süknâya kemâl mertebe ihtiyâcı olmağın kendi mâlından menzil-i merkūmun tecdîd ve ta‘mîrine sarf ettiği meblağ ile müceddeden ebniyesi mülk-i mahzı olmak üzere taraf-ı şer‘den binâsına izin olduğu ecilden binâ etmişdi, hâlâ savb-ı şer‘den menzil-i merkūmun üzerine varılıp sarf ettiği meblağın mertebe-i tahammülü ve nıkzı tahmîn-i sahîh ile tahmîn olunmak matlûbudur deyicek, kıbel-i şer‘den Mevlânâ Mustafa Efendi irsâl olunup ol dahi mi‘mârân-ı hâssadan Ali Çelebi b. Halil nâm mi‘mâr ve zeyl-i kitâbda mastûrü’l-esâmî Müslimîn ile mahall-i mezkûra varıp müşâhede ettiklerinde tûlen ve kadden bi-hesâb-ı şatrancî yüz elli beş zirâ‘ taş duvarının her zirâ‘ı ellişer akçe hesâbı üzere yedi bin yedi yüz elli akçe ve üç yüz on iki zirâ‘ dolma tuğla duvarının her zirâ‘ı otuzar akçe hesâbı üzere dokuz bin üç yüz yirmi akçe ve iki aded fevkānî menzilin üç yüz yirmi dört zirâ‘ sakfına her zirâ‘ı ellişer akçe hesâbı üzere on altı bin iki yüz akçe ve doksan zirâ‘ tavanının her zirâ‘ı otuzar akçeden iki bin yedi yüz akçe ve yüz doksan iki zirâ‘ döşemesinin her zirâ‘ı ellişer akçe hesâbı üzere dokuz bin altı yüz akçe ve yedi penceresine herbiri ikişer yüz akçeden bin dört yüz akçe ve yedi camına bin yüz kırk akçe ve iki masandrasına bin akçe ve iki ocağına altı yüz akçe ve üç dolabına altı yüz akçe ve iki nerdübânına sekiz yüz akçe ve yüz iki zirâ‘ taş havlu duvarının her zirâ‘ı ellişer akçeden beş bin yüz akçe ve kırk beş zirâ‘ padavra perdesinin her zirâ‘ı on beşer akçeden altı yüz yetmiş beş akçe ve orta kapısına iki yüz akçe ve sokak kapısına iki yüz akçe ( ) altı yüz akçe ve iki kenîfine bin akçe cem‘an müvekkilem mezbûre Emine Hatun’un sarfının elli dokuz bin dört yüz yirmi beş akçeye ve arsası beher sene üç yüz akçe mukāta‘aya tahammülü olduğunu mi‘mâr-ı merkūm tahmîn-i sahîh ile tahmîn edip haber verdiğini mevlânâ-yı mezbûr mahallinde tahrîr edip ba‘dehû meclis-i şer‘de gelip inhâ ve takrîr ettikden sonra meblağ-ı mezbûrdan ba‘de’t-tahmîn on üç bin üç yüz on iki akçesi nıkzına ihrâc olunup bâkī kalan kırk altı bin yüz on üç akçelik ebniye-i cedîdesi müvekkile-i mezbûrenin olmak üzere mâ-hüve’l-vâkı‘ bi’t-taleb ketb u terkīm olundu. Fî-evâili evveli’l-cemâzeyn li-sene tis‘a ve selâsîn ve elf. Şühûdü’l-hâl: Ahmed Efendi b. Ali el-kâtib, Rıdvan Efendi b. Abdülmennan, İsmail Efendi b. Ali el-imâm, Abdullah Efendi, Yunus Efendi b. Handan Ağa.