Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 613 Hüküm no: 555 Orijinal metin no: [179M/a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Benar bt. Vartan’ın boşandığı kocası Haremeyn Evkafı reayasından Haçik v. Mogumşah’dan çeyizlerini alması Mahmiye-i Galata muzâfâtından kasaba-i Beşiktaş’a tâbi‘ karye-i Kuruçeşme sâkinelerinden Benar bt. Vartan nâm Ermeniye tarafından husûs-ı âti’l-beyâna vekîl olup bimâ hüve tarîku’s-sübût şer‘an vekâleti sâbite olan babası mezbûr Vartan meclis-i şer‘-i şerîf-i enverde Haremeyn-i Şerîfeyn Evkāfı re‘âyâsından olup müvekkile-i mezbûrenin zevc-i mutallıkı bâ‘isü hâze’l-kitâb Haçik v. Mogumşah nâm Ermeni muvâcehesinde bi’l-vekâle ikrâr-ı tâm ve takrîr-i kelâm edip mezbûr Haçik kızım müvekkile-i mezbûreyi talâk-ı bâyin ile tatlîk ettikde hîn-i zifâfda cihâz nâmına verdiğim bir sîm kemer kuşak ve bir beyâz atlas kaftan ve bir kırmızı bogasi zıbın ve üç gömlek ve bir sîm yüzük ve üç munakkaş makrame mezbûr Haçik’in yedinde bâkī kalmış idi, el-hâletü hâzihî eşyâ-i mezbûre-i mutallak-ı mezbûreyi mutallık-ı mezbûr Haçik yedinden vekâletim hasebi ile tamâmen ahz u kabz edip husûs-ı mezbûra müte‘allik da‘vâ ve talebden zimmetini vekâletim hasebiyle ibrâ ve ıskāt ettim dedikde gıbbe’t-tasdîki’ş-şer‘î bi’t-taleb ketb olundu. Tahrîren fî-evâsıtı Cemâziyelâhire li-sene tis‘a ve selâsîn ve elf. Şühûdü’l-hâl: İsmail Beşe b. Ali er-râcil, Ahmed b. Abdullah, Ali [b.] Rıdvan, Hasan b. Abdullah, Ali Beşe b. Ahmed er-râcil, Murad b. Abdullah.