Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 614 Hüküm no: 557 Orijinal metin no: [179M/a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı reayasından Kuruçeşme’de oturan Ermenilerin vergilerini vakfa verdiklerinden başkalarınca rahatsız edilmemeleri Atebe-i aliyye ve südde-i seniyyede Dârüssaâde ağası olan iftihârü’l-havâs ve’l-mukarrebîn mu‘temedü’l-mülûk ve’s-selâtîn sâhibü’l-izzi ve’t-temkîn el-mahfûfu bi-sunûfi avâtıfi’l-meliki’l-mu‘în hazret-i İdris Ağa b. Abdülkerim mahzarında akd-i meclis olundukda nâzırı oldukları Haremeyn-i Muhteremeyn Evkāfı’nın perâkende re‘âyâsından mahrûsa-i Galata muzâfâtından kasaba-i Beşiktaş nâhiyesine tâbi‘ Kuruçeşme’de sâkin Ermeni tâifesinden hâfızû hâze’l-kitâb Murad v. Masarşah [ve] Vartan v. Papas ve Haçik v. Mogumşah ve sâirleri meclis-i merkūmda ağa-yı mûmâ-ileyh hazretleri huzûrunda takrîr-i kelâm edip mâ-tekaddemden beri Haremeyn-i Şerîfeyn Evkāfı re‘âyâsından olmağla ispençemiz ve cürm-i cinâyet ve bâd-ı hevâ ve resm-i arûsâne ve bi’l-cümle rüsûm-ı mu‘tâdemiz cânib-i vakf-ı şerîfden ahz u kabz olunup serbest olduğumuz yedimizde ekîd ve şedîd evâmir-i şerîfe ve sûret-i Defter-i Hâkānî var olmağın hâricden dahl olunagelmiş değil iken hâlâ hilâf-ı emr-i şerîf ve mugāyir-i kanun-ı münîf hâricden dahl olunmakdan hâlî değiliz, yedimizde olan evâmir-i şerîfe ve sûret-i Defter-i Hâkānî’ye nazar olunup mûcebince savb-ı şer‘den dahi temessük taleb ederiz deyu ibrâz ettikleri ahkâma nazar olundukda vech-i merkūm üzere re‘âyâ-yı evkāf-ı mezbûre min-külli’l-vücûh serbest olup âhardan bir ferde rencîde ettirilmeye deyu buyurulmağın işbu hurûf ketb olundu. Fî-evveli’r-rebî‘ayn li-sene tis‘a ve selâsîn ve elf. Şühûdü’l-hâl: Fahrü’l-kuzât Ali Efendi, fahrü’l-emsâl Mehmed Bey el-bevvâbü’s-sultânî, zahrü’l-ekârim Ahmed Bey b. Abdülmennan, fahrü’l-akrân Abdurrahman Bey el-bevvâb, Ali Bey b. Abdülmennan.