Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 616 Hüküm no: 560 Orijinal metin no: [179M/b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi’nin Çukadar Ali Bey tarafından vakfedilen evi teslim alması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip mahrûsa-i Üsküdar’da Karakadı mahallesinde sâkin iken vefât eden merhûm Çukadâr Ali Bey hâl-i hayâtında mahalle-i mezbûrede vâki‘ bir tarafdan yine kendi vakfı ve bir tarafdan mahalle-i mezbûre mescidi imâmetine meşrût olan menzil ve bir tarafdan Tenbel Mescidi imâmetine meşrût olan menzil ve bir tarafdan tarîk-i âm ile mahdûd iki beyt-i ulvî ve bir sofa ve bir harâbe ahırı ve kenîfi müştemil menzilini vakf ve habs edip süknâsını evvelâ nefsine ba‘dehû karındaşı oğlu Ahmed Çelebi b. Derviş Bey’e ba‘dehû Haremeyn-i Şerîfeyn fukarâsına şart edip meşrûtün-leh olan mezbûr Ahmed Çelebi fevt olmağla menzil-i mezbûr cânib-i evkāf-ı mezbûreye âid olmuşdur, [180a] cânib-i şer‘den üzerine varılıp mu‘âyene ve tahrîr olunması matlûbumdur dedikde savb-ı şer‘den Mevlânâ Ali Efendi irsâl olunup ol dahi hâssa mi‘mârlardan Üstâd Hasan Çelebi b. Hüseyin ve zeyl-i kitâbda isimleri mastûr olan Müslimîn ile üzerine [varıp] mu‘âyene ve mesâha eylediklerinde bennâ zirâ‘ı ile tûlen on beş buçuk ve arzen sekiz bi-hesâb-ı şatrancî yüz yirmi dört zirâ‘ arsa üzerine mebnî menzil-i mezbûru müşâhede eylediklerinde mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı Cemâziyelâhire li-sene tis‘a ve selâsîn ve elf. Şühûdü’l-hâl: Fahrü’l-müderrisîn İbrahim Efendi el-kassâm, es-Seyyid Fazlullah Efendi b. es-Seyyid Mehmed el-imâm, Yusuf Ağa b. Abdullah, İsmail Çelebi b. Mahmud el-bevvâb ve gayruhüm.