Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 617 Hüküm no: 561 Orijinal metin no: [180a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergah-ı Âlî yeniçerilerinden Ahmed Beşe b. Abdullah’ın mutasarrıf olduğu vakıf evin kendisi dışarda iken Abdi Beşe b. Ali’ye kiraya verilmesi Dergâh-ı Âlî -dâme mahfûfen bi’l-me‘âlî- yeniçerilerinden Ahmed Beşe b. Abdullah meclis-i şer‘-i şerîf-i enverde Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed mahzarında ikrâr-ı tâm ve takrîr-i kelâm edip evkāf-ı mezbûreden olup mahmiye-i İstanbul’da Edirnekapısı kurbünde Hadice Sultan mahallesinde vâki‘ icâre-i mu‘accele ve ayda yirmi akçe ücret-i müeccele ile mutasarrıf olduğum lede’l-ahâlî ma‘lûmü’l-hudûd menzilin ben âhar diyârda olmağla sekiz seneden beru mu‘ayyen olan ayda yirmi akçe icâre-i müeccelesi cânib-i vakfa edâ olunmağın beni? bilâ-veled fevt olup menzil-i mezbûr mahlûl olmak zu‘mu ile mütevellî-i mezbûr icâre-i mu‘accele ve ayda yirmi akçe ücret-i müeccele ile Abdi Beşe b. Ali nâm râcile îcâr edip ol dahi vech-i muharrer üzere istîcâr ve kabûl ettikden sonra izn-i şer‘ ve ma‘rifet-i mütevellî ile mezbûr Abdi Beşe menzil-i mersûmu müceddeden binâ edip istirdâd kābil olmamağın mukaddemâ cânib-i vakfa icâre-i mu‘accelesine teslîm ettiğim yedi bin akçeyi evkāf-ı mezbûre mâlından mütevellî-i mersûm İsmail Çelebi yedinden ahz u kabz edip menzil-i mezbûra müte‘allik da‘vâdan fâriğ oldum dedikde gıbbe’t-tasdîki’ş-şer‘î bi’t-taleb ketb olundu. Tahrîren fî-evâhiri şehri Recebi’l-ferd li-sene semân ve selâsîn ve elf. Şühûdü’l-hâl: Edâî? Abdullah Efendi el-kādî, Abdülhalim Çelebi b. Mehmed el-müderris, Ömer Efendi el-müsta‘id, Ramazan Efendi el-müsta‘id, Ali Bey b. Abdullah el-bevvâb.