Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 617 Hüküm no: 562 Orijinal metin no: [180a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı mütevellisi İsmail Çelebi b. Mehmed’in Sinan Paşa mahallesinden Mehmed Bey tarafından vakfedilen evi teslim alması Haremeyn-i Şerîfeyn Evkāfı’na bi’l-fi‘il mütevellî olan fahrü’l-akrân İsmail Çelebi b. Mehmed meclis-i şer‘-i şerîf-i enverde takrîr-i kelâm edip mahmiye-i Galata’ya tâbi‘ kasaba-i Kasımpaşa mahallâtından Sinan Paşa mahallesinde sâkin Mehmed Bey nâm kimesne hâl-i hayâtında mahalle-i mezbûrede vâki‘ bir tarafdan Sarı Mehmed Çelebi mülkü ve bir tarafdan Cebeciler Çorbacısı Ali Bey mülkü ve bir tarafdan …? Süleyman Çelebi mülkü ve bir tarafdan tarîk-i âm ile mahdûd olup iki beyt-i ulvî, altında matbah ve sofa ve dahlîz ve kenîf ve bi’r-i mâ ve hadîkayı müştemil menzilini vakf ve habs edip süknâsını evvelâ nefsine ba‘dehû utekāsına ba‘dehâ Haremeyn-i Şerîfeyn fukarâsına şart edip meşrûtün-lehüm bi’l-külliye münkarız olmağla menzil-i mezbûr evkāf-ı mezbûreye âid olmuşdur, cânib-i şer‘den üzerine varılıp mu‘âyene ve mesâha olunması matlûbumdur dedikde savb-ı şer‘den Mevlânâ Ali Efendi [irsâl olunup] ol dahi hâssa mi‘mârlardan Üstâd Ali Çelebi b. Halil ve zeyl-i kitâbda isimleri mastûr olan Müslimîn ile üzerine varıp mu‘âyene ve mesâha eylediklerinde bennâ zirâ‘ı ile tûlen elli altı ve arzen [on altı zirâ‘] bi-hesâb-ı şatrancî sekiz yüz doksan altı zirâ‘ arsa üzerine mebnî menzil-i mezbûru müşâhede eylediklerinde mevlânâ-yı mezbûr mahallinde tahrîr ba‘dehû gelip meclis-i şer‘de inhâ ve takrîr etmeğin mâ-hüve’l-vâkı‘ bi’t-taleb ketb olundu. Tahrîren fî-evâsıtı Cemâziyelâhire li-sene tis‘a ve selâsîn ba‘de elf. Şühûdü’l-hâl: Mustafa Çelebi b. Mehmed el-kâtib, Mustafa Bey b. Yusuf el-bevvâb, Veli Dede b. Ali, Derviş b. Mehmed Abdullah ve gayruhüm.