Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 625 Hüküm no: 570 Orijinal metin no: [183a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haremeyn Evkafı reayasının vergi teklifiyle rahatsız edilmemelerini emreden ferman sureti Emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm sâhibü’l-izzi ve’l-ihtişâm el-muhtassu bi-mezîdi inâyeti’l-meliki’l-allâm Rumeli beylerbeyisi -dâme ikbâlühû- ve mefâhirü’l-kuzât ve’l-hükkâm me‘âdinü’l-fezâil ve’l-kelâm Kilmigad ve Zile ve Haremeyn-i Şerîfeyn Evkāfı olan kādılar -zîde fazluhum- tevkī‘-i refî‘-i hümâyûn vâsıl olıcak ma‘lûm ola ki, Dârüssaâde ağası olan iftihârü’l-havâs ve’l-mukarrebîn Hacı Mustafa Ağa tarafından mukaddemâ Dersaâdet’ime arz olundu ki bi’l-fi‘il nâzırı olduğum Haremeyn-i Şerîfeyn Evkāfı re‘âyâsı min-külli’l-vücûh mefrûzü’l-kalem ve maktû‘ü’l-kadem serbest olduğundan mâ‘adâ avârız-ı dîvâniyyeden ve tekâlîf-i örfiyyeden mu‘âf ve müsellem olup hâricden dahl olunagelmiş [değil] iken hâlâ beylerbeyi? ve sancakbeyi ve kethüdâları ve sâir ehl-i örf nâmında olan mücerred celb ve ahz için hilâf-ı şer‘ ve kanun ve muğāyir-i emr-i hümâyûn fukarâsının üzerlerine ziyâde âdemler ile gelip ehl-i ıyâlleri ile sâkin oldukları evlerinin üzerlerine konup müft [ü] meccânen yem ve yiyeceklerin ve arpa ve saman ve koyun ve kuzu ve tavuk ve küçük ve selâmlık ve na‘l bahâ nâmıyla salgun ve teklîf edip fukarâyı rencîde eylemekle evkāf-ı mezbûrenin ekser re‘âyâsı dağılıp mahsûl-i vakfa zarar terettüb etmişdir, evkāf-ı mezbûre re‘âyâsı üslûb-ı sâbık üzere avârız-ı dîvâniyye tekâlîf-i örfiyyeden mu‘âf ve müsellem olup min-[ba‘d] beylerbeyi? ve sancakbeyi ve âdemleri ve subaşıları ve sâir ehl-i örf tâifesi hilâf-ı mu‘âfnâme-i hümâyûn te‘addî ve tecâvüz ettirilmemek bâbında emr-i şerîf verilip ve Mâliye tarafından dahi müte‘addid evâmir-i şerîfe vârid olmağla Dîvân-ı Hümâyûn tarafından mukaddemâ verilen emr-i şerîfim mûcebince bunları rencîde ve remîde ettirmeyesiz, hilâf-ı şer‘ ve kanun ve mugāyir-i emr-i hümâyûn kimesneye iş ettirmeyesiz deyu mukaddemâ emr-i şerîf verilip bu ana değin getirip tecdîd eylemediğin bildirip hâlâ tecdîd olunmasın ricâ etmeğin buyurumdum ki bu bâbda mukaddemâ verilen emr-i şerîf mûcebince amel olunup hilâfına ruhsat ve cevâz göstermeyesiz, şöyle bilesiz, alâmet-i şerîfe i‘timâd kılasız. Tahrîren el-yevmü’s-sânî min-Zilka‘deti’ş-şerîfe li-sene erba‘a ve selâsîn ve elf. Be-makām-ı Kostantıniyye el-mahrûsa. Tıbku aslihi’l-mutâ‘ harrerehü’l-fakīr Kemaleddin b. eş-Şeyh Mehmed el-müvellâ-hilâfeten bi-mahkemeti Beşiktaş -ufiye anhümâ-