Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 626 Hüküm no: 571 Orijinal metin no: [183a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıcılar Kethüdası Ahmed Ağa’nın tasarrufundaki Haremeyn Evkafı’na ait evin tasarruf hakkını Hüseyin Ağa’ya devretmesi Hüccet-i Hüseyin Ağa Kethüdâ-i Kapudan Paşa Budur ki, Atebe-i aliyye ve südde-i seniyyede kethüdâ-i bevvâbân olan iftihârü’l-emâcid ve’l-ekârim câmi‘ü’l-mehâmid ve’l-mekârim zü’l-kadri’l-aliyyi ve’ş-şâni’l-celî el-mahfûfu bi-sunûfi avâtifi’l-meliki’l-mennân Ahmed Ağa b. Abdülmennan meclis-i şer‘-i şerîf-i lâzımü’t-tevkīrde düstûr-ı ekrem müşîr-i müfehham Kapudan Hasan Paşa -yesserallâhü fi’d-dâreyn mâ-yürîd ve mâ-yeşâ- hazretlerinin kethüdâsı olan fahrü’l-emâsil ve’l-ekârim hâfızü hâze’r-rakīm Hüseyin Ağa b. Abdurrahim mahzarında ikrâr-ı tâm ve takrîr-i kelâm edip mahrûsa-i İstanbul’da vâki‘ Haremeyn-i Şerîfeyn Evkāfı’ndan mahallât-ı mahrûsa-i merkūmeden Ayasofya-i Kebîr kurbünde vâki‘ Üsküplü mahallesinde bir tarafı mahalle-i mezbûre mescidine vakf olan menzil ile ve bir tarafı merhûm Kasım Paşa mülkü ile ve bir tarafı tarîk-i hâs ile mahdûd dâhiliyyesinde ulvâ ve süflâ büyût-ı müte‘addideyi ve üç aded bi’r-i mâyı ve hadîka-i eşcâr-ı müsmire ve gayr-ı müsmireyi ve kenîfi ve muhavvatayı müştemil olup icâre-i mu‘accele ve müeccele ile tasarrufumda olan menzilin hakk-ı tasarrufunu hâlâ evkāf-ı mezbûra mütevellî olan fahrü’l-emâsil İsmail Çelebi b. Mehmed ma‘rifeti ile müşârun-ileyh Hüseyin Ağa’ya tefvîz edip ol dahi ta‘ahhüd ve tefevvüz ettikden sonra mukābele-i tefvîzden yedinden iki bin guruş ahz u kabz edip tasarrufuna izin verdim dedikde gıbbe’t-tasdîki’ş-şer‘î vicâhen ve şifâhen mâ-hüve’l-vâkı‘ bi’t-taleb ketb ve terkīm olundu. Fî-evâili şehri Recebi’l-ferd li-sene tis‘a ve selâsîn [ve elf]. Şühûdü’l-hâl: Fahrü’l-kuzât Ali Efendi, zahrü’l-müderrisîn Abdülhalim Çelebi, zahrü’l-müsta‘iddîn Abdullah Çelebi, Ali Çelebi b. ( ), Hasan Çelebi b. Hüseyin ve gayruhüm.