Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 627 Hüküm no: 572 Orijinal metin no: [183b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Ali’nin tasarrufunda iken yanması üzerine kendi malıyla yeniden yaptırdığı vakıf evi Üftade bt. Abdullah’a satması Havvâ bt. Ali nâm hatun mahfil-i kazâda sâhibetü’l-kitâb Üftade bt. Abdullah mahzarında ikrâr ve takrîr-i kelâm edip mahmiye-i İstanbul’da el-Hâc Küçük mahallesinde vâki‘ bir tarafı Mehmed Çelebi mülkü ve bir tarafı Mehmed Ağa mülkü ve bir tarafı Rüstem Paşa Vakfı ve bir tarafı tarîk-i âm ile mahdûd tûlen ve arzen bi-hesâb-ı şatrancî üç yüz elli iki zirâ‘ arsa ile üzerinde olan binâ bundan akdem sâhibetü’l-hayrât merhûme Emine bt. İbrahim nâm hatun vakf ve habs edip süknâ ve tevliyyetini evvelâ nefsine ba‘dehâ zevci Mehmed Bey b. Ali’ye ba‘dehüm Medîne-i Münevvere fukarâsına şart eylemiş idi, lâkin zikr olunan binâ târîh-i kitâbdan on yedi sene mukaddem bi’l-külliye muhterik olmağla nıkzı mün‘adim oldukda mezbûr Mehmed Bey’in evlâdı olduğum ecilden arsa-i mezbûrenin tevliyyet ve tasarrufu bana intikāl etmeğin ben dahi mâlım ile kendi mülküm olmak üzere iki beyt-i süflî ve bir zulle ve kenîf ihdâs eylemiş idim , el-hâletü hâzihî ebniye-i mezbûreyi tarafeynden îcâb ve kabûlü hâvî bey‘-i bât ile on yedi bin akçeye mezbûre Üftade’ye bey‘ ve teslîm ve arsa-i mezbûresi dahi tevliyyetim hasebiyle ikişer akçeye mezbûre Üftade’ye îcâr eylediğimden ol dahi vech-i muharrer üzere ebniye-i mezbûreyi iştirâ ve tesellüm ve arsa-i mezbûreyi istîcâr ve kabûl eyledikden sonra meblağ-ı mezbûr on yedi bin akçeyi bi’t-tamâm yedinden ahz u kabz eyledim dedikde gıbbe’t-tasdîk bi’t-taleb ketb olundu. Fî-evâsıtı Cemâziyelâhire li-sene hamse ve selâsîn ve elf. Şühûdü’l-hâl: İbrahim Çelebi b. Ebîbekir, Mustafa Bey b. Yusuf el-bevvâb, Osman Efendi b. Mehmed,, Hasan b. Mustafa.