Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 109 Hüküm no: 33 Orijinal metin no: [4b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Kapıcı Ahmed Ağa b. Mehmed’in evinin oğlu ve karısına intikal ettiği Mahmiye-i İstanbul’da Debbâğ Yunus mahallesi ahâlîsinden olup bundan akdem hacc-ı şerîfden gelir iken esnâ-i tarîkde vefât eden kapıcı Ahmed Ağa b. Mehmed’in hasren vârisleri olan zevce-i metrûkesi Râbia bt. el-Hâc Ali nâm hâtun ile kebîr oğlu olup kendi tarafından asıl ve li ebeveyn er karındaşı İsmail Ağa tarafından husûs-ı âti’l-beyâna vekîl olduğu bimâ hüve tarîkü’s-sübût şer‘an vekâleti sâbite olan Ali Çelebi nâm kimesneden vech-i âtî üzre istihbâr-ı şer‘î sudûrundan sonra mahalle-i mezbûre imâmı Abdullah Efendi b. Mehmed ve müezzini İbrahim Efendi b. Abdülmennân ve ahâlîsinden Hüseyin Çelebi b. Hızır ve neccâr Hasan Beşe b. Abdullah [5a] ve Abdi Çelebi b. Ramazan nâm kimesneler li ecli’l-ihbâr meclis-i şer‘a hâzırûn olup istişhâd olunduklarında fi’l-hakīka mahalle-i mezbûrede vâki‘ bir tarafdan Musli Efendi vakfı olup meşrûtiyyet üzre oğlu Derviş Mehmed Efendi tasarrufunda olan menzil ve bir tarafdan ba‘zen mahalle-i mezbûrede imâm olanlara meşrût vakıfı menzil ve ba‘zen nalçacı Şaban mülkü ve iki tarafdan tarîk-i âm ile mahdûd olup hâriciyye ve dâhiliyyesinde fevkānî ve tahtânî büyût-ı adîde ve hamam ve hadîka ve bi’r-i mâ ve kenîfi müştemil menzilin arsasını müteveffâ-yı mezbûr hayâtında târih-i kitâbdan yirmi beş sene mukaddem mâlikesi kutucu Hızır nâm kimesneden semen-i ma‘lûma iştirâ ve tesellüm ve malı ile mülkü olmak üzre üzerine ebniye-i mezbûreyi binâ edip ile’l-vefât mülkiyyet üzre mutasarrıf iken vefât ettikde irsle verese-i mezbûreye intikāl etmişidi deyû her biri haber vermeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer min Rebî‘ilâhir sene [10]77. Şuhûdü’l-hâl: Ali Çelebi b. Şaban, Mehmed b. ( ) Beyzâde, Sinan Bey b. Ahmed, Mehmed Çelebi b. ( ), hamamcı Mehmed Çelebi b. el-Hâc Musli, Ahmed Efendi b. Mehmed el-İmâm, Mehmed Halîfe b. Veli el-Müezzin