Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 110 Hüküm no: 34 Orijinal metin no: [5a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Söz konusu evin Emir Nureddin Vakfı mütevellisine bey‘ bi’l-istiğlâl yoluyla satıldığı Mahmiye-i İstanbul’da Debbâğ Yunus mahallesi sükkânından olup bundan akdem hacc-ı şerîfden gelir iken esnâ-i tarîkde vefât eden kapıcı Ahmed Ağa b. Mehmed’in hasren vârisleri olan zevce-i metrûkesi Râbia bt. el-Hâc Ali nâm hâtun asâleten ve kebîr oğlu olup kendi tarafından asıl ve li ebeveyn er karındaşı İsmail Ağa tarafından husûs-ı âti’l-beyâna vekîl olduğu İmâm Abdullah Efendi b. Mehmed ve müezzin İbrahim Efendi b. Abdülmennân nâm kimesneler şehâdetleri ile şer‘an sâbit olan Ali Çelebi nâm kimesne meclis-i şer‘-i şerîfde merhûm Emin Nureddin vakfı mütevellîsi olan râfi‘ü’l-kitâb Mustafa Efendi b. Mehmed mahzarında her biri ikrâr ve takrîr-i kelâm edip tereke-i müteveffâ-yı mezbûrdan olup mahalle-i mezbûrede vâki‘ bir tarafdan Musli Efendi vakfı olup meşrûtiyyet üzre oğlu Derviş Mehmed Efendi tasarrufunda olan menzil ve bir tarafdan mahalle-i mezbûrede imâm olanlara meşrûta vakıf menzil ve ba‘zen nalçacı Şaban mülkü ve iki tarafdan tarîk-i âm ile mahdûd hâriciyye ve dâhiliyyesinde fevkānî ve tahtânî büyût-ı adîde ve hamam ve hadîka ve bi’r-i mâyı ve kenîfi müştemil menzilimi yüz yetmiş beş esedî guruşa mezbûr Mustafa Efendi’ye bi tarîki’l-istiğlâl bey‘ ve teslîm ol dahi vech-i muharrer üzre iştirâ ve kabz edip semen-i mezbûru tamâmen yedinden ahz u kabz ettiğimizden sonra mezbûr Mustafa Efendi menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin otuz beş esedî guruşa bize îcâr ve teslîm, biz dahi istîcâr ve tesellüm eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Rebî‘ilâhir li sene seb‘ ve seb‘[în] ve elf. Şuhûdü’l-hâl: Sâbikūn.