Evkaf-ı Hümâyûn Müfettişliği 1 Numaralı Sicil (H. 1016-1035 / M. 1608-1626) cilt: 45, sayfa: 633 Hüküm no: 580 Orijinal metin no: [185a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. El-Hac Mahmud b. el-Hac Yusuf’un vefat etmiş olan sancakbeyi Ali Bey b. Süleyman’daki alacağının kızı Fatma’dan tahsil edilmesi Kasaba-i Kasımpaşa mahallâtından Tahtagazi [Tahtakadı] mahallesi sâkinlerinden fevt olan merhûm el-Hâc Mahmud b. el-Hâc Yusuf nâm kimesnenin eytâmına vasiyy-i muhtârı Hüseyin b. Abdullah mahfil-i kazâda işbu râfi‘atü’l-kitâb Fâtıma Hatun bt. Ali Bey mahzarında bi’t-tav‘i’s-sâf ikrâr u i‘tirâf edip bundan akdem Magosa’da mîrlivâ iken fevt olan Ali Kırk Bey b. Süleyman vasiyy-i muhtârı olduğum merhûm-ı mezbûr el-Hâc Mahmud’dan seksen beş bin akçe alıp târîh-i kitâbdan mahallesi ve hudûdu ve müştemilâtı batn-ı hüccetde tahrîr olan mülk menzilini bi-tarîki’l-istiğlâl bey‘ edip yine beher sene sekizer bin beş yüz akçeye istîcâr ettikden sonra hâl-i sıhhatinde edâ ve teslîm edemeyip vefât etmiş, hâlâ sulbiye kızı Fâtıma Hatun’dan sâlifü’z-zikr seksen beş bin akçeyi verâseti hasebiyle bana bi’l-külliye teslîm edip ben dahi vesâyetim hasebiyle merhûm-ı mezbûrun eytâmları için bî-kusûr merkūme Fâtıma yedinden alıp kabz edip merhûn olan menzili fekk-i rehn eyledim, min-ba‘d mezbûrun asl-ı mâlından ve icâresinden bir habbe ve bir akçe bâkī kalmayıp müteveffâ-yı mezbûr Ali Bey’in veresesi ile batn-ı hüccetde mastûr olan seksen beş bin akçeye müte‘allik bi-vechin mine’l-vücûh da‘vâ ve nizâ‘ ve talebim yokdur, da‘vâ edersem lede’l-hükkâmi’l-kirâm-ı zevi’l-ihtirâm mesmû‘a ve makbûle olmasın deyicek, vasiyy-i mezbûrun vech-i meşrûh üzere sudûr eden ikrârını merkūm Fâtıma Hatun bi’l-müvâcehe tahkīk ve bi’l-müşâfehe tasdîk edicek, mâ-hüve’l-vâkı‘ alâ-vukū‘ihî bi’t-taleb ketb ve yed-i tâlibe def‘ olundu. Tahrîren fî-evâsıtı şehri Saferi’l-hayr li-sene semân ve elf. Şühûdü’l-hâl: İbrahim b. Mehmed, Mustafa Çavuş b. Abdullah, İsa b. Sadi, Piyale b. Abdullah, İbrahim b. Hamza, Hasan b. Abdullah, Hüseyin b. Ali, Ömer b. Sadık, Mehmed Çelebi b. Receb ve gayruhüm.