Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 110 Hüküm no: 35 Orijinal metin no: [5a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Güllü bt. Abdullah’ın İvaz Beşe b. Hasan’dan muhâlaa yoluyla boşandığı Mahmiye-i İstanbul’da Haraçcı Muhyiddin mahallesinde sâkine Güllü bt. Abdullah nâm hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâb İvaz Beşe b. Hasan nâm kimesne mahzarında ikrâr ve takrîr-i kelâm edip zevcim merkūm İvaz Beşe zimmetinde mütekarrir [ve] ma‘kūdun-aleyh olan dört bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim merkūm İvaz Beşe ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra zevciyyete ve gayra müte‘allika âmme-i de‘âvîden her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Rebî‘ilâhir li sene [10]77. Şuhûdü’l-hâl: Mehmed Beşe b. Sefer, Ahmed Beşe b. Musa, Hasan Beşe b. Musa, Hasan b. Hüseyin.