Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 43 Hüküm no: 3 Orijinal metin no: [2-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophane kolağalarından Hüseyin Hüsnü Efendi’ye velisi olduğu Ahmed Rıza’nın tasarrufundaki Ümmühani Hatun Vakfı’na ait ev hissesinin satışına izin verilmesi Medîne-i Hazret-i Ebî Eyyûb el-Ensârî -radiye anhu Rabbihi’l-Bârî- mahallâtından Zal Mahmudpaşa Mahallesinde sâkine iken bundan akdem vefât eden Cemile Hanım bt. el-müteveffâ Mehmed Naim Efendi’nin sadrî sagīr oğlu Ahmed Rıza’nın babası ve velîsi olup mahmûdü’l-hâl idiği ihbâr olunan Tophâne-i âmire kolağalarından işbu bâ‘isü’l-kitâb Hüseyin Hüsnü Efendi b. Hüseyin Kâmil m. bi’l-velâye takrîr-i kelâm ve ta‘bîr ani’l-merâm edüp Nezâret-i Evkāf-ı Hümâyûn’a mülhak evkāfdan merhûm Ümmühani Hatun Vakfı musakkafâtından mahalle-i mezbûrede kâin ma‘lûmü’l-hudûd ve’l-müştemilât altı kıt‘a temessükle şehriye cem‘an yüz üç akçe icâre-i müeccelelü bir bâb menzil babası müteveffâ-yı mezbûr Mehmed Naim Efendi b. Abdullah intikālinden hayatında müteveffiye-i mezbûre Cemile Hanım ile li-ebeveyn kız karındaşı Sıhhiye Hanım’ın âdiyen bi’l-icâreteyn taht-ı tasarrufunda ve mezbûre Cemile Hanım’ın dahi mu‘ahharan vefâtıyla menzil-i mezkûrda olan nısf hisse-i şâyi‘ası sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyüp bekāsı sagīr-i mezbûr hakkında muzır ve gayr-ı müfîd olmağla sagīr-i mezbûrun menzil-i mezkûrda olan nısf hisse-i şâyi‘asını bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle ma‘an hıfz olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup Havâss-ı Refî‘a kādısı fazîletlü es-Seyyid Hüseyin Neşet Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan sîm mecîdiye yirmi guruş hesâbıyla on bin guruş mukābelesinde âhara ferâğa izin taleb şüd, ilâ-âhirihî. Fî 10 Şa‘bân sene [1]300 Şühûdü’l-hâl: Ata Efendi b. İbrahim, medîne-i mezkûre mahkemesi muhzırânından Nuri Efendi b. Üveys.