Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 43 Hüküm no: 4 Orijinal metin no: [2-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mehmed Ağa’nın vefatıyla küçük çocuklarına intikal eden vakıf ev arsası hisselerinin satışına izin verilmesi Salim, izin Numara: ( ), harcı: ( ) guruş. Mahmiye-i İstanbul’da Sultan Ahmed kurbünde Nahılbend mahallesinde sâkin iken bundan akdem vefât eden berber esnâfından Mehmed Ağa b. Ahmed’in sulbî sagīr oğlu Hasan Kâzım ve sulbiye sagīre kızı Fatıma Melek’in tesviye-i emirlerine bâ-hüccet-i şer‘iye vasîyy-i mansûbu işbu bâ‘isü’l-kitâb Mustafa Ağa b. Mehmed m. bi’l-vesâye takrîr-i kelâm edüp Nezâret-i Evkāf-ı Hümâyûn’a mülhak evkāfdan vâkıf-ı mûmâ-ileyhin câmi‘-i şerîfinde müezzin olanlara tevliyet ve gallesi meşrûta olan vakfı musakkafâtından mahalle-i mezbûrede Şeftali Çeşmesi sokağında kâin otuz numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir kıt‘a muhterik menzil arsası müteveffâ-yı mezbûrun hayatında bâ-temessük mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbiye kebîre kızı Hadice Binnaz Hanım’a hasbe’l-âde islâsen intikāl edüp lâkin arsa-i mezkûre bî-hâsıl olarak bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâcları olmağla sagīrân-ı mezbûrânın arsa-i mezkûrede olan hisse-i şâyi‘aları bedel-i misliyle bâ-re’y-i mütevellî âhara ferâğa ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında vücûhla enfa‘ ve evlâ olduğuna binâen işbu yedimde olup Birinci Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın arsa-i mezkûrede olan hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin dört yüz seksen sekiz guruş mukābelesinde bâ-re’y-i mütevellî âhara ferâğa izin taleb şüd. Fî 3 Şa‘bân sene [1]300 Şühûd: Ömer Ağa b. Kadri, Muhzır Mehmed Ağa b. Mustafa ve gayruhum.