Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 45 Hüküm no: 6 Orijinal metin no: [3-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arapgir kazasından Ermeni Hayırlıoğlu Haci Serkiz’in emaneten ev hissesine el koyan Bakkal Abraham’dan hissesini almak üzere Gözübüyükoğlu Arakil Efendi’yi vekil tayin etmesi İbrahim, vekâlet Numara: 33, 40 guruş. Harput vilâyet-i celîlesine tâbi‘ Arapgir kazâsı mahallâtından Berenge mahallesinde sâkin teba‘a-i Devlet-i Aliyye’nin Ermeni milletinden Hayıroğlu Haci Serkiz v. Kirkor v. Atam tarafından ber-vech-i âtî vekâlet iddi‘â eden işbu bâ‘isü’r-rakīm teba‘a-i merkūmenin Protestan milletinden Cezâ Dâiresi ketebesinden Gözübüyükoğlu Arakil Efendi v. Ohannes v. Kigork m. zikri âtî menzil hissesine bi’l-emâne vâzı‘ü’l-yed olan Bakkāl Abraham v. Yani muvâcehesinde üzerine da‘vâ ve takrîr-i kelâm edüp Emîr Ahmed el-Buhârî hazretlerinin dâmâd-ı mükerremleri Mehmed Çelebi Vakfı musakkafâtından Beyoğlu civârında Pangaltı’nda Çimen sokağında vâki‘ iki yüz yirmi dokuz numara ile murakkam ma‘lûmü’l-hudûd ve’l-müştemilât şehriye seksen akçe icâre-i müeccelelü bir bâb menzilin nısf hisse-i şâyi‘ası gāib-i merkūmun bâ-sened-i hâkānî taht-ı tasarrufunda ve merkūm Abraham nısf hisse menzil-i mezkûra gāib-i merkūmun teslîmiyle bi’l-emâne vâzı‘ü’l-yed olup ancak gāib-i merkūm ber-vech-i muharrer mutasarrıf olduğu nısf hisse-i mezkûreyi merkūmun yedinden nez‘ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzunu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup sene-i sâbıkā Cemâziyelâhire’sinin yirmi dokuzuncu günü târihiyle müverraha Arapgir kazâsı nâibi Ali el-Naci Efendi’nin imzâ ve hâtemini hâviye bir kıt‘a vekâlet hücceti ve hüccet-i mezkûrenin zahrında muharrer Bidâyet Mahkemesi’nin memhûr mazbatası mantûklarınca târih-i mezkûrda mahkeme-i mezbûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup nısf hisse menzil-i mezkûrdan keff-i yed ve vech-i lâyıkıyla bana teslîme merkūm Abraham’a tenbîh olunmak murâdımdır dedikde gıbbe’s-suâl ol dahi cevâbında nısf hisse menzil-i mezkûr gāib-i merkūmun ber-vech-i muharrer tasarrufunda olup kendüsü dahi ber-vech-i muharrer bi’l-emâne vâzı‘ü’l-yed olduğunu ikrâr mâ‘adâ müdde‘î-i merkūmun vekâlet müdde‘âsını inkâr şüd, ilâ-âhirihî. Fî 17 Şa‘bân sene [1]300 Şühûdü’l-hâl: Mehmed Emin b. Mustafa, Ömer Ağa b. Kadri ve gayruhum.