Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 46 Hüküm no: 8 Orijinal metin no: [4-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine Hanım’ın mütevellisi olduğu Salyaneci Mahmud Ağa Vakfı’na ait işleri görmek üzere Hasan Muammer Bey’i vekil tayin etmesi İsmail Hakkı Numara: 73, 40 guruş Havâss-ı Refî‘a kazâsına muzâfe Hasköy’de Südlüce mahallesinde sâkine zâtı ta‘rîf-i şer‘î ile mu‘arrefe olan Şerife Emine Hanım bt. Mehmed Emin m. Asâkir-i Şâhâne İtfâiye Alayı yüzbaşılarından işbu bâ‘isü’l-kitâb Hasan Muammer Bey b. Mehmed Neşet mahzarında ikrâr-ı tam ve takrîr-i kelâm [edip] Nezâret-i Evkāf-ı Hümâyûn’a mülhak evkāfdan merhûm Sâlyâneci Mahmud Ağa Vakfı’nın tevliyeti benim bâ-berât-ı âlî el-yevm üzerinde olup ancak ben müsin[ne] ve ihtiyâre olmamla ber-vech-i muharrer mutasarrıfa olduğum tevliyet-i mezkûre umûrunu kemâ-hiye hakkuhâ idâreye gayr-ı muktedire olduğumdan umûr-ı vakf-ı mezkûru idâre ve rü’yet ve musakkafât ve müstegallâtından vukū‘ bulacak ferâğ ve intikālâtını istimâ‘ ve i‘tâ-i izne ve mahlûl vukū‘unda tâlibine îcâra ve alınacak harclardan tevliyete âid hisseyi ahz ü kabza ve vakf-ı mezkûrun cibâyet ve kitâbet ve cihât-ı sâiresinden hâl vukū‘unda arz ve ittihâba ve sâl be-sâl muhâsebesini rü’yete ve musakkafât ve müstegallâtı hakkında her ne gûne da‘vâ vukū‘ bulur ise terâfu‘ ve husûmete ve redd ü cevâba ve husûs-ı mezkûr mütevakkıf olduğu umûrun küllîsine lede’l-iktizâ tarafından âharı tevkîle mezûn olmak üzere tarafımdan mûmâ-ileyh Hasan Muammer Bey’i vekâlet-i mutlaka-i sahîha-i şer‘iye ile vekîl nasb ü ta‘yîn eyledim dedikde ol dahi vekâlet-i mezkûre[yi] kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 16 Şa‘bân sene [1]300 Şühûd: Muhzır Mehmed Ağa b. Mustafa, es-Seyyid Kâzım Efendi b. Mehmed Şakir.