Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 48 Hüküm no: 10 Orijinal metin no: [4-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola’nın kızları Fani, Praşkova ve Hıristiya’nın, Yani’nin elinde olan bostan hisselerini almak üzere Sitori’yi vekil tayin etmeleri Yanya vilâyeti dâhilinde Leskovik sancağına tâbi‘ nefs-i Leskovik kazâsı kurâsından Çarşova karyesinde mütemekkine ve Devlet-i Aliyye teba‘asının Rum milleti nisvânından Fani ve Praşkova ve Hıristiya benât-ı Nikola v. İlya taraflarından ber-vech-i âtî vekâlet iddi‘â eden teba‘a-i Devlet-i Aliyye’den ve millet-i merkūmeden işbu hâmilü’r-rakīm Sitori v. Proto Mahkeme-i Teftîş’de ma‘kūd meclis[de] zikri âtî bostan hissesine bi’l-emâne vaz‘-ı yedi mütehakkık olan yine teba‘a-i Devlet-i Aliyye’den ve millet-i merkūmeden Yani v. Kosta mahzarında üzerine da‘vâ ve takrîr-i kelâm edüp merhûme ve mağfûrun-lehâ Cedîd Vâlide Sultan hazretlerinin evkāf-ı şerîfeleri müstegallâtından medîne-i Üsküdar’da Rum Mehmedpaşa mahallesinde Bostan sokağında vâki‘ ma‘lûmü’l-hudûd sekiz numara ile murakkam senevî yüz elli guruş icâre-i müeccelelü mülk ma‘a gedik bir kıt‘a bostanın senevî otuz altı buçuk guruş on para icârelü hissesi on iki hisse i‘tibârıyla üç hissesi gāibât-ı merkūmâtın bâ-temessük mütevellî bi’l-icâreteyn taht-ı tasarruflarında olup ve merkūm Yani hisse-i mezkûreye gāibât-ı merkūmâtın teslîmleriyle bi’l-emâne vâzı‘ü’l-yed olup ancak gāibât-ı merkūmât ber-vech-i muharrer mutasarrıfa oldukları hisselerini merkūm Yani’nin yedinden nez‘ ü kabza ve ba‘de’l-kabz bedel-i misliyle bâ-re’y-i mütevellî âhara ferâğa ve bedelini ahz ü kabza ve makbûzumu kendülere irsâl ve îsâle ve husûs-ı mezkûr mütevakkıf olduğu umûrun küllîsine işbu yedimde olup sene-i sâbıkā Zilhicceti’ş-şerîfesi’nin gurresi târihiyle müverraha livâ-i mezkûr nâibi Abdurrahim Efendi’nin imzâ ve hâtemini hâviye bir kıt‘a vekâlet hücceti ve zahrında muharrer livâ-i mezkûr Bidâyet Mahkemesi’nin memhûr mazbatası mantûklarınca taraflarından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûreden keff-i yed ve bana teslîme merkūm Yani’ye tenbîh olunmak bi’l-vekâle murâdımdır deyü hüccet ve mazbata-i mezkûreyi ibrâz ile da‘vâ et[dik]de ol dahi cevâbında hisse-i [5] mezkûreye vaz‘-ı yedini ikrâr lâkin müdde‘î-i merkūmun vekâlet müdde‘âsını inkâr şüd, ilâ-âhirihî. Fî 9 Ramazan sene [1]300