Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 49 Hüküm no: 11 Orijinal metin no: [5-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Teberdarân-ı Hâssa’dan Mehmed Şerif Efendi’nin vefatıyla küçük çocuklarına intikal eden ev hisselerinin satılması için izin verilmesi İzin, İbrahim Numara: 93, 75 guruş Medîne-i Üsküdar’da Rum Mehmedpaşa mahallesinde sâkin iken bundan akdem vefât eden teberdârân-ı hâssadan Mehmed Şerif Efendi b. Receb’in sulbî sagīr oğulları Receb ve Abdullah ve İbrahim’in vâlideleri ve tesviye-i umûrlarına bâ-hüccet-i şer‘iye vasiyyeleri zâtı ta‘rîf-i şer‘î ile mu‘arrefe işbu bâ‘isetü’l-vesîka Fatıma Seher Hanım bt. Abdullah m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan merhûme Hâce Âişe Sultan Vakfı musakkafâtından mahalle-i mezbûrede vâki‘ ma‘lûmü’l-hudûd ve’l-müştemilât yedi numara ile murakkam şehriye otuz akçe icâre-i müeccelelü bir bâb menzilin nısf hisse-i şâyi‘ası müteveffâ-yı mezbûrun hayatında bâ-sened-i hâkānî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde islâsen intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın nısf hisse menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh, hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi Mehmed Salim Efendi ile Dokuzuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın nısf hisse menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin elli guruş mukābelesinde bâ-re’y-i mütevellî âhara ferâğa izin taleb şüd. Fî 3 Ramazan sene [1]300 Şühûdü’l-hâl: Şirket-i Hayriye vapurlarında ikinci makinist Mustafa Ağa b. Mustafa, Saray-ı Cedîd teberdârlarından el-Hâc Hüseyin Ağa b. Mustafa ve gayruhum. Derûn-ı hüccetde bast ü beyân olunduğu üzere vasiyye-i mezbûre Seher Hanım sagīrân-ı mezbûrânın nısf hisse menzil-i mezkûrlarının bedel-i misli idiği mütehakkık olan beş bin elli guruş mukābelesinde Mehmed Ağa b. Osman’a ol dahi der-akab vasiyye-i mezbûre Fatıma Seher Hanım’a ba‘de’l-ferâğ vasiyye-i mezbûre Fatıma Seher Hanım sagīrân-ı mezbûrânın mâllarından ve li-ecli’l-idâne vasî nasb olunan mezbûr Mehmed Ağa yedinden istidâne ve kabz eylediği lira-yı Osmânî yüz guruş hesâbıyla beş bin elli guruş deyni mukābelesinde nısf hisse menzil-i mezkûru sagīrân-ı mezbûrâna vefâen ferâğ edeceğinden ol-vechile Defter-i hâkānîde ferâğları icrâ ve temessükleri tahşiye olunmak üzere işbu mahalle şerh verildi.