Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 111 Hüküm no: 36 Orijinal metin no: [5a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Mustafa Bey’in beytülmâlce el konulan mallarının kardeşi Ali’ye verilmesi Vilâyet-i Anadolu’da kasaba-i Gümüşhâne sükkânından işbu râfi‘ü’l-kitâb Ali b. Abdullah nâm kimesne meclis-i şer‘-i hatîr-i lâzımü’t-tevkīrde mukaddemâ İstanbul’da beytülmâl-i hâssa emîni olmağla mahmiye-i mahkiyede Ayasofya-i Kebîr mahallesinde sâkin iken bundan akdem vefât eden Mustafa Bey b. Abdullah’ın zâhir vâris-i ma‘rûfu olmamak zu‘mu ile terekesine bi’l-emâne vâzı‘ü’l-yed olan Hüseyin Ağa b. ( ) mahzarında üzerine da‘vâ edip ben müteveffâ-yı mezbûrun li ebeveyn karındaşı ve hasren vârisi olup hattâ benim için hayâtında li ebeveyn karındaşımdır, verâsetim mezbûra münhasıradır deyû mahzar-ı müslimînde ikrâr ve i‘tirâf edip musırran alâ ikrârihî fevt olmağla terekesi şer‘an bana intikāl etmişken emîn-i mezbûr nâ-hak vaz‘-ı yed etmeğin suâl olunup bana teslîme tenbîh olunmak matlûbumdur dedikde gıbbe’s-suâl emîn-i mezbûr Hüseyin Ağa cevâbında tereke-i müteveffâ-yı mezbûra vaz‘-ı yedini ikrâr lâkin müteveffâ-yı merkūmun vech-i mübeyyen üzre ikrârını inkâr edicek müdde‘î-i mezbûrdan müdde‘âsına beyyine taleb olundukda udûl-i müslimînden olup mahalle-i mezbûre sükkânından Ali b. Yahya ve mahmiye-i mezbûrede Bitpazarı sûkunda sâkin İbrahim b. Mehmed nâm kimesneler li ecli’ş-şehâde meclis-i şer‘a hâzırân olup isre’l-i[sti]şhâd fi’l-vâki‘ müteveffâ-yı mezbûr Mustafa Bey hayâtında bizim huzûrumuzda müdde‘î-i mezbûr Ali için li ebeveyn karındaşım ve hasren vârisimdir deyû ikrâr ve mezbûr Ali tasdîk edip musırran aleyh vefât eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûl olmağın mûcebince ba‘de’l-hükm mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn min Rebî‘ilâhir li sene seb‘a ve seb‘în ve elf. Şuhûdü’l-hâl: Süleyman b. Ahmed, Receb Beşe b. Osman, Mehmed b. İbrahim, Mehmed Efendi b. Hasan, Veli Çelebi b. Resul, Hasan Çelebi b. Mehmed, Osman b. Yusuf.