Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 51 Hüküm no: 13 Orijinal metin no: [6-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Şemseddin Efendi’nin vefatıyla küçük kızları Hatice Behice ve Ayşe Nevber’e intikal eden ev hisselerinin satışına izin verilmesi Küçük İbrahim, izin: 1 kıt‘a Numara: 90, 112,5 guruş Medîne-i Üsküdar’da Vâlide-i atik mahallesinde sâkin iken bundan akdem vefât eden Osman Şemseddin Efendi b. el-müteveffâ Cerrâh Mehmed Efendi’nin sulbiye sagīre kızları Hadice Behice ve ÂişeNevber’in vâlideleri ve tesviye-i emirlerine bâ-hüccet-i şer‘iye vasîyy-i mansûbeleri zâtı ta‘rîf-i şer‘î ile mu‘arrefe işbu bâ‘isetü’l-kitâb Âişe Nuriye Hanım bt. Abdullah m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Arslanzâde Vakfı musakkafâtından mahalle-i mezbûrede kâin iki numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası babası müteveffâ-yı mezbûr Mehmed Efendi b. Hüseyin intikālinden müteveffâ-yı mezbûr Osman Şemseddin Efendi’nin hayatında âdiyen bi’l-icâreteyn taht-ı tasarrufunda olup ba‘de vefâtihî sagīretân-ı mezbûretâna hasbe’l-âde münâsafeten intikāl edüp lâkin menzil-i mezkûr müşrif-i harâb olarak hâsılı harcına vefâ etmeyip bekāsı sagīretân-ı mezbûretân haklarında muzır ve gayr-ı müfîd olduğundan mâ‘adâ sagīretân-ı mezbûretânın nafaka ve kisveye eşedd-i ihtiyâçları olmağla sagīretân-ı mezbûretânın menzil-i mezkûrda olan nısf hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīretân-ı mezbûretân haklarında her vechile enfa‘ ve evlâ olduğuna binâen işbu yedimde olup hâlâ medîne-i mezkûre nâibi mekremetlü Mehmed Salim Efendi ile Dokuzuncu Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīretân-ı mezbûretânın menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde bâ-re’y-i mütevellî âhara ferâğa izin taleb şüd. Fî 29 Şa‘bân sene [1]300 Şühûdü’l-hâl: Yorgancı esnâfından ketebeden Mustafa Efendi b. Rıza, Rıza Ağa b. Hasan ve gayruhum. [7] Derûn-ı hüccetde bast ü beyân olunduğu vasiyy[e]-i mezbûre Âişe Hanım sagīretân-ı mezbûretânın menzil-i mezkûrda olan nısf hisse-i şâyi‘asını bedel-i misli idiği mütehakkık olan lira-yı Osmânî yüz guruş hesâbıyla yedi bin beş yüz guruş mukābelesinde Muhzır Mehmed Ağa b. Osman’a ol dahi der‘ akab meblağ-ı merkūm mukābelesinde vasiyye-i mezbûre Âişe Nuriye Hanım’a bâ-re’y-i mütevellî kat‘iyyen ba‘de’l-ferâğ vasiyy[e]-i mezbûre Âişe Nuriye Hanım sagīretân-ı mezbûretânın müşterek mâllarından ve li-ecli’l-idâne vasî nasb olunan mezbûr Mehmed Ağa yedinden istidâne ve kabz eylediği lira-yı Osmânî yüz guruş hesâbıyla yedi bin beş yüz guruş deyni mukābelesinde nısf hisse menzil-i mezkûru sagīretân-ı mezbûretâna bâ-re’y-i mütevellî vefâen ferâğ edeceğinden senedât idâresinde ol-vechile ferâğı icrâ ve sened-i hâkānîsi i‘tâ olunmak üzere işbu mahalle şerh verildi.