Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 53 Hüküm no: 14 Orijinal metin no: [7-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kaptan-ı derya Kayserili Ahmed Paşa’nın vefatıyla küçük çocukları Mustafa ve Gâlib Beylere intikal eden mahzen hisselerinin satışına izin verilmesi Nazmi, izin: 1 kıt‘a Numara: 116, 153 guruş Mahmiye-i İstanbul’da Süleymaniye kurbünde Molla Hüsrev mahallesinde mukīm iken bundan akdem irtihâl-i dâr-ı bekā eden kapudan-ı deryâ esbak Kayserili Ahmed Paşa b. el-müteveffâ Mehmed Ağa’nın sulbî sagīr mahdûmları Mustafa ve Gālib Beylerin tesviye-i emirlerine vasîyy-i muhtârları sa‘âdetlü Hüseyin Hamid Beyefendi hazretleri b. el-merhûm Salih Efendi m. bi’l-vesâye takrîr-i kelâm ve ta‘bîr ani’l-merâm edüp Evkāf-ı Hümâyûn Hazînesi’nden mazbût Cağalzâde merhûm Rüstempaşa Vakfı musakkafâtından mahmiye-i mezbûrede Tahte’l-kal‘a civârında vâkıf-ı mûmâ-ileyhin câmi‘-i şerîfi kurbünde Çukurhan demekle ma‘rûf hanın hâricinde kâin mehâzînlerden mahkeme karşısında tulumba dibinden ta‘dâd olundukda üç ve beş ve yedi numaralar ile murakkam ma‘lûmü’l-hudûd ve’l-müştemilât beher şehr altmışar akçe icâre-i müeccelelü üç bâb mahzenlerin nısf hisse-i şâyi‘ası müteveffâ-yı mûmâ-ileyhin hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mûmâ-ileyhimâ ile sulbî kebîr mahdûmu Mehmed Latif Bey ve sulbiye kebîre kerîmeleri Hayriye ve Münire ve Âdile hanımlara isdâsen intikāl edüp lâkin mahzen-i mezkûrlar ânen fe-ânen müşrif-i harâb olarak hâsılı harcına vefâ etmeyip bekāsı gayr-ı nâfi‘ olduğundan mâ‘adâ kibâr-ı mûmâ-ileyhim hisse-i şâyi‘alarını âhara ferâğ edeceklerinden sagīrân-ı mûmâ-ileyhimânın hisseleri dahi kibâr-ı mûmâ-ileyhimin hisseleriyle ma‘an bedel-i misilleriyle bâ-re’y-i mütevellî âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla ma‘an hıfz olunmak sagīrân-ı mûmâ-ileyhimâ haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mûmâ-ileyhimânın mahzen-i mezkûrlarda olan iki südüs hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misilleri idiği bi’l-ihbâr zâhir olan lira-yı Osmânî yüz guruş hesâbıyla on bin iki yüz guruş mukābelesinde bâ-re’y-i mütevellî âhara ferâğa kıbel-i şer‘den izin taleb şüd. Fî 9 Şevvâl sene [1]300 Şühûdü’l-hâl: Kısmet-i askeriye muhzırlarından Hasan Efendi b. Abdullah, el-Hâc Hasan Efendi b. İbrahim ve gayruhum.