Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 54 Hüküm no: 15 Orijinal metin no: [7-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hatun’un ev ve bahçe hissesine el koyan Ahmed Şükrü Efendi’den hissenin alınması Salih, vekâlet Numara: 109, 40 guruş Edirne vilâyeti dâhilinde medîne-i Kırkkilise mahallâtından Câmi‘-i Kebîr mahallesinde sâkine Ümmühani Hatun bt. Maltaş Memiş Kapudan b. Abdullah tarafından ber-vech-i âtî vekâlet iddi‘â eden işbu bâ‘isü’l-kitâb Leblebicizâde Hüseyin Efendi b. Şeyh Hafız Mehmed Efendi m. zikri âtî menzil ve bağçe hisselerine bi’l-emâne vaz‘-ı yedi mütehakkık olan Debbâğ Yunus mahallesi imâmı es-Seyyid el-Hâc Ahmed Şükrü Efendi b. es-Seyyid Mehmed Servet mahzarında üzerine da‘vâ ve takrîr-i kelâm edüp nezâret-i Evkāf-ı Hümâyûn’a mülhak evkāfdan İstanbul’da Sultan Selim kurbünde Debbâğ Yunus Mescid-i şerîfinde imâm olanlara galle ve tevliyeti meşrûta merhûme Şirmerd Hatun Vakfı’na şehriye yirmi akçe ve yine Sultan Selim kurbünde Çukurbostan dâhilinde vâki‘ merhûm Hatîb Muslihiddin Mustafa Efendi’nin binâ eylediği mescid-i şerîfi vakfına şehriye cem‘an altmış akçe ve merhûme Şahhuban Hatun Vakfı’na şehriye kırk akçe icâre-i müeccelelü evkāf-ı mezkûre musakkafâtından zikri mürûr eden Debbâğ Yunus mahallesinde kâin Çifteçeşme sokağında sekiz numara ile murakkam bir bâb menzil ve bağçenin nısf hisse-i şâyi‘ası müvekkilem gāibe-i mezbûre Ümmühani Hatun’un bâ-temessükât-ı mütevellî bi’l-icâreteyn taht-ı tasarrufunda ve mezbûr es-Seyyid el-Hâc Ahmed Şükrü Efendi nısf hisse menzil ve bağçe-i mezkûrda gāibe-i mezbûrenin teslîmiyle bi’l-emâne vâzı‘ü’l-yed olup ancak gāibe-i mezbûre ber-vech-i muharrer mutasarrıfa olduğu nısf hisse-i mezkûrları mezbûr es-Seyyid el-Hâc Ahmed Şükrü Efendi yedinden nez‘ ü kabza ve ba‘de’l-kabz nısf hisse-i mezkûrları gāibe-i mezbûrenin sadrî kebîr mahdûmu medîne-i [8] Kırkkilise’de Rüsûm Sened Müdîri Mehmed Vehbi Efendi’ye on bin guruş bedel mukābelesinde mütevellîleri re’yleriyle kat‘iyyen ferâğını takrîre ve bedel-i merkūmu ahz ü kabza ve makbûzumu kendüye irsâl ve îsâle ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke şehr-i Ramazani’l-mübârekinin ikinci günü târihiyle müverraha medîne-i Kırkkilise nâibi Feyzullah Efendizâde es-Seyyid Mustafa Âsım Efendi’nin imzâ ve hâtemini hâviye bir kıt‘a vekâlet hüccceti ve hüccet-i mezkûre hâmişinde muharrer Bidâyet Mahkemesi’nin memhûr mazbatası mantûklarınca nâib-i mûmâ-ileyh tarafından mürsel Kâtib Süleyman Fehim Efendi’nin zikr olunan Kırkkilise’de Câmi‘-i Kebîr mahallesinde gāibe-i mezbûrenin sâkine olduğu menzilde huzûr-ı Müslimînde akd eylediği meclis-i şer‘de tarafından beni vekâlet-i mutlaka-i sahîha-i şer‘iye ile bi’l-muvâcehe vekîl nasb ü ta‘yîn eylediğinde ben dahi vekâlet-i mezkûreyi kabûl etmemle suâl olunup nısf hisse menzil ve bağçe-i mezkûrlardan keff-i yed ve vech-i lâyıkıyla bana teslîme mûmâ-ileyh es-Seyyid el-Hâc Ahmed Şükrü Efendi’ye tenbîh olunmak müvekkilem gāibe-i mezbûreye izâfetle bi’l-vekâle murâdımdır dedikde gıbbe’s-suâl mûmâ-ileyh es-Seyyid el-Hâc Ahmed Şükrü Efendi dahi cevâbında nısf hisse menzil ve bağçe-i mezkûrlar gāibe-i mezbûrenin bâ-temessük-i mütevellî bi’l-icâreteyn taht-ı tasarrufunda olup kendüsü dahi gāibe-i mezbûrenin teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i mûmâ-ileyhin vekâlet müdde‘âsını inkâr etmekle hüccet ve mazbata-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr kılındığına ve me‘âli vekîl-i mûmâ-ileyhin takrîr-i meşrûhuna muvâfık ve mazbata-i mezkûre dahi mazmûn-ı hüccet-i mezkûreyi musaddık ve müeyyid olduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i mezbûrun vekâletine ba‘de’l-hükm nısf hisse menzil ve bağçe-i mezkûrlardan keff-i yed ve müdde‘î vekîl-i mezbûr Hüseyin Efendi’ye vech-i lâyıkıyla teslîme mûmâ-ileyh es-Seyyid el-Hâc Ahmed Şükrü Efendi’ye tenbîh olunmağın mâ-vaka‘a bi’t-taleb ketb olundu. Fî 5 Şevvâl sene [1]300 Şühûd[ü’l-hâl]: Muhzır Mehmed Ağa b. Mustafa, Muhzırbaşı Ömer Ağa b. Abdulkadir ve gayruhum.