Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 55 Hüküm no: 16 Orijinal metin no: [8-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aşçı Haci Parsih’in vefatıyla küçük çocuklarına intikal eden ev hisselerinin satışına izin verilmesi Nazmi, izin: 1 kıt‘a Numara: 131, 24 guruş Havâss-ı Refî‘a kazâsına tâbi‘ kasaba-i Hasköy’de Turşucu mahallesinde sâkin iken bundan akdem fevt olan Devlet-i Aliyye teba‘asının Ermeni milletinden Aşçı Haci Parsih v. Sagar’ın sulbî oğlu Dikran ve sulbiye sagīre kızı Agonin’in vâlideleri ve tesviye-i emrlerine bâ-hüccet-i şer‘iye vasîyy-i mansûbeleri teba‘a-i merkūme nisvânından zâtı mu‘arrefe işbu bâ‘isetü’r-rakīm Aranisk bt. Kigork m. bi’l-vesâye takrîr-i kelâm ve ta‘bîr ani’l-merâm edüp nezâret-i Evkāf-ı Hümâyûn’a mülhak evkāfdan merhûm Kiremitçi Ahmed Çelebi Vakfı musakkafâtından kasaba-i mezkûrede Yağhâne sokağında vâki‘ yirmi bir numara ile murakkam ma‘lûmü’l-hudûd ve’l-müştemilât beher şehr yirmi akçe icâre-i müeccelelü bir bâb menzilin nısf hisse-i şâyi‘ası müteveffâ-yı merkūmun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīrân-ı merkūmân ile sulbî kebîr oğulları teba‘a-i merkūmeden Bedros ve Kigork ve sulbiye kebîre kızları teba‘a-i merkūme nisvânından Marnik ve Diyabron’a? esdâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı merkūmân haklarında muzır olduğundan mâ‘adâ sagīrân-ı merkūmânın nafaka ve kisveye dahi eşedd-i ihtiyâçları olmağla sagīrân-ı merkūmânın nısfdan iki südüs hisse-i şâyi‘aları bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı merkūmân haklarında her vechile enfa‘ ve evlâ olduğuna binâen işbu yedimde olup Havâss-ı Refî‘a kādısı fazîletlü Hüseyin Neşet Efendi ile Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı merkūmânın nısfdan iki südüs hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin altı yüz seksen [9] üç guruş on beş para mukābelesinde bâ-re’y-i mütevellî âhara ferâğa izin taleb şüd. Fî 12 Şevvâl sene [1]300 Şühûdü’l-hâl: Ataullah Efendi b. Hüseyin, el-Hâc Nuri Ağa b. Üveys ve gayruhum.