Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 56 Hüküm no: 17 Orijinal metin no: [9-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfçı Ahmed Ağa’nın vefatıyla küçük oğlu Vasfi’ye intikal eden menzilin satışına izin verilmesi Aziz, izin: 1 kıt‘a Numara: 135, 79,5 guruş Mahmiye-i İstanbul’da Saraçhânebaşı kurbünde Dülgerzâde mahallesinde sâkin iken bundan akdem vefât eden Kadayıfçı el-Hâc Ahmed Ağa b. Mehmed’in sulbî sagīr oğlu Vasfi’nin vâlidesi ve tesviye-i umûruna bâ-hüccet-i şer‘iye vasiyye-i mansûbesi olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtımatü’z-zehra Hanım bt. Ali m. bi’l-vesâye takrîr-i kelâm ve ta‘bîr ani’l-merâm edüp kapudan-ı esbak merhûm Gāzi Hayreddin Paşa Vakfı musakkafâtından mahmiye-i mezkûrede Karagümrüğü kurbünde Atik Ali Paşa mahallesinde Çukurbostan sokağında vâki‘ ma‘lûmü’l-hudûd elli altı numara ile murakkam şehriye otuz akçe icâre-i müeccelelü bir kıt‘a menzil vasiyyesi müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin arsa-i mezkûre bî-hâsıl ve etrâfını muhît taş duvarları münhedim olarak enkāzı mürûr-ı eyyâm ile telef ve zâyi‘ olacağı zâhir ve bedîdâr olup ol-vechile bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye eşedd-i ihtiyâcı olmağla sagīr-i mezbûrun arsa-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca arsa-i mezkûre bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla beş bin guruş ve nef‘an li’s-sagīr zam olunan üç yüz guruş ki cem‘an beş bin üç yüz guruş mukābelesinde bâ-re’y-i mütevellî âhara ferâğa izin taleb şüd. Fî 20 Şa‘bân sene [1]300 Şühûd[ü’l-hâl]: Hüseyin Hüsnü Efendi b. Osman, Mehmed Şükrü Efendi b. İsmail ve gayruhum.