Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 57 Hüküm no: 18 Orijinal metin no: [9-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i Zabtiye yüzbaşılarından Mustafa Ağa’nın vefatıyla küçük kızı Fatma Hatice’ye intikal eden ev hissesinin satışına izin verilmesi Küçük İbrahim, izin: 1 kıt‘a Numara: 124, 44 guruş Mahrûse-i Galata’ya muzâfe kasaba-i Tophâne’de Cihangir mahallesinde sâkine iken bundan akdem vefât eden asâkir-i zabtiye yüzbaşılarından el-Hâc Mustafa Ağa b. Abdullah’ın sulbiye sagīre kızı Fatıma Hadice’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi olup zâtı ta‘rîf-i şer‘î ile mu‘arrefe işbu bâ‘isetü’l-kitâb Fatıma Firdevs Hanım bt. Tâhir m. bi’l-vesâye takrîr-i kelâm edüp nezâret-i Haremeynü’ş-şerîfeyn’e mülhak evkāfdan sadr-ı esbak merhûm Ragıb Mehmed Paşa Vakfı musakkafâtından mahalle-i mezbûrede kâin altmış bir numara ile murakkam ma‘lûmü’l-hudûd ve’l-müştemilât yevmî bir akçe icâre-i müeccelelü bir bâb menzil müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīre-i mezbûre ile sulbî kebîr oğulları Mustafa ve Aziz Mahmud Efendilere hasbe’l-âde islâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye dahi eşedd-i ihtiyâcı olmağla sagīre-i mezbûrenin menzil-i mezkûrda olan sülüs hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûre menzil-i mezkûrda olan sülüs hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla üç bin guruş bedel mukābelesinde bâ-re’y-i mütevellî âhara ferâğa izin taleb şüd. Fî 13 Şevvâl sene [1]300 Şühûd[ü’l-hâl]: Kısmet-i askeriye muhzırlarından Mehmed Tosun Ağa b. Mehmed, Mâliye Hazînesi’nde Vâridât Odası emlâk kâtibi İzzet Efendi b. Hüseyin ve gayruhum.