Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 58 Hüküm no: 19 Orijinal metin no: [10-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapıcıbaşızâde Yusuf Kethuda Vakfı mütevellisi Mehmed Ârif Efendi’nin hastalanmasıyla iyileşinceye değin yerine Emine Münire Hanım’ın tayin edilmesi Ali, nasb-ı kāimmakām Numara: ( ), 40 guruş Nezâret-i Evkāf-ı Hümâyûn’dan mazbût evkāfdan merhûme Mihrişah Sultan -tâbe serâhû[â]- Hazretleri Vakfı mülhakātından CivanKapıcıbaşızâde Yusuf Kethudâ Vakfı’nın bâ-berât-ı âlî mütevellîsi Vergi Emânet-i Aliyye Kuyûdât Kalemi ketebesinden Mehmed Ârif Efendi b. Halil’e işbu târih-i hüccetden beş ay mukaddem cünûn târî olarak el-yevm medîne-i Üsküdar’da Toptaşı nâm mahâlde vâki‘ tımarhânede tedâvî olunmakda olduğundan hâl-i sıhhatine değin vakf-ı mezkûrun umûrunu idâre ve rü’yete ve ferâğ ve intikālâtı istimâ‘ ve i‘tâ-i izne ve mahlûlâtı âhara îcâra ve alınan harclardan tevliyete âid hisseyi mecnûn-ı mezbûr içün ahz ü kabza vakf-ı mezkûra kıbel-i şer‘den bir kāimmakām ta‘yîni lâzım ve mühim olmağın mecnûn-ı mûmâ-ileyhin li-ebeveyn kız karındaşı olup emîne ve müstakīme ve her vechile kāimmakāmlık uhdesinden gelmeğe muktedire idiği zâtını ârifân zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mütehakkık olan işbu bâ‘isetü’l-kitâb Emine Münire Hanım’ı hâkim-i muvakkı‘-ı sadr-ı kitâb tûbâ-[lehû] ve hüsn- meâb efendi hazretleri vakf-ı mezkûr umûrunu idâre ve rü’yete ve ferâğ ve intikālâtını istimâ‘ ve i‘tâ-i izne ve mahlûlâtı nizâmı vechile âhara îcâra ve alınan harclardan tevliyete âid hisseyi mecnûn-ı mezbûr içün ahz ü kabza kıbel-i şer‘den kāimmakām nasb ü ta‘yîn buyurduklarında ol dahi kabûl ve hizmet-i lâzımesini kemâ-yenbagī edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 5 Şevvâl sene [1]300 Şühûdü’l-hâl: Mehmed Ağa b. Mustafa, Ömer Ağa b. Kadri ve gayruhum.