|
Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 111 Hüküm no: 37 Orijinal metin no: [5a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sâliha bt. Mustafa’nın, Mehmed b. Mehmed’den muhâlaa yoluyla boşandığı
Mahmiye-i İstanbul’da Sultan Selim kurbunda Enserci mahallesi sâkinelerinden Sâliha bt. Mustafa nâm hâtun tarafından hul‘-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Ahmed Çelebi b. Mehmed ve Abdullah Çelebi b. İbrahim nâm kimesneler şehâdetleriyle şer‘an ikrâra vekâleti sâbite olan vâlidesi Fâtıma bt. Mahmud nâm hâtun meclis-i şer‘de müvekkilem mezbûrenin zevci işbu bâ‘isü’l-kitâb Mehmed b. Mehmed nâm kimesne mahzarında ikrâr ve takrîr-i kelâm edip müvekkilem mezbûre Sâliha Hâtun’un zevci merkūm Mehmed ile zimmetinde mütekarrir [ve] ma‘kūdun-aleyh olan altı bin akçe mehr-i müeccelimi ve nafaka-i iddet-i ma‘lûmesi üzerlerine ve me’ûnet-i süknâm dahi kendi üzerine olmak üzre ve zevci mezbûr Mehmed’in firâşından hâsıl olan sagīr oğlu Ahmed’in dahi târih-i kitâbdan yedi sene tamâmına değin kendi malından [5b] infâk ve iksâ etmek üzre mezkûr Mehmed ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl edip zevciyyete müte‘allika âmme-i de‘âvîden her biri âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde gıbbe’t-tasdîk mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn Rebî‘ilâhir sene [10]77
Şuhûdü’l-hâl: Mehmed Efendi b. Ali el-Müezzin, Receb Beşe b. Osman el-Mübâşir, Hüseyin Beşe b. Abdullah, Mustafa b. Ahmed, Kerim Çelebi b. Mustafa
|