Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 64 Hüküm no: 26 Orijinal metin no: [14-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Civan Osman Ağa’nın vefatıyla küçük oğlu İhsan’a intikal eden ev hissesinin satışına izin verilmesi Nazmi, izin: 1 kıt‘a Numara: ( ), ( ) guruş Medîne-i Hazret-i Ebî Eyyûb el-Ensârî -radiye anhü’l-bârî- mahallâtından İslâmbey mahallesinde sâkin iken bundan akdem vefât eden Civan Osman Ağa b. Abdullah’ın sulbî sagīr oğlu İhsan’ın vâlidesi ve tesviye-i umûruna bâ-hüccet-i şer‘iye vasiyye-i mansûbesi zâtı ta‘rîf-i şer‘î ile mu‘arrefe olan işbu bâ‘isetü’l-kitâb Feride Hanım bt. Mahmud m. bi’l-vesâye takrîr-i kelâm edüp nezâret-i Evkāf-ı Hümâyûn’a mülhak evkāfdan Bayburdî Mustafa Ağa Vakfı musakkafâtından mahalle-i mezbûrede Civan sokağında bir numara ile murakkam ma‘lûmü’l-hudûd ve’l-müştemilât şehriye otuz akçe icâre-i müeccelelü bir bâb menzilin nısf hisse-i şâyi‘ası sagīr-i mezbûrun bâ-sened-i hâkānî bi’l-icâreteyn taht-ı tasarufunda olup lâkin menzil-i mezkûr müşrif-i harâb olup hâsılı harcına vefâ etmediğinden mâ‘adâ sagīr-i mezbûrun nafaka ve kisveye eşedd-i ihtiyâcı olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup hâlâ Havâss-ı Refî‘a kādîsı fazîletlü es-Seyyid Hüseyin Neşet Efendi ile İkinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde âhara ferâğa izin taleb şüd. Fî 18 Ş sene [1]300 Şühûdü’l-hâl: ( ) ve gayruhum.