Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 66 Hüküm no: 28 Orijinal metin no: [15-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sudi Efendi’nin vefatı üzerine küçük oğlu Salih Molla’ya annesi Emine İfakat Hanım’ın vasi tayin edilmesi Mustafa Zühdü, vasî Hudâvendigâr-ı esbak cennet-mekân Sultan Ahmed Hân-ı evvel -tâbe serâhû- hazretleri evkāf-ı şerîfeleri musakkafâtından İstanbul’da Sofular mahallesinde Ahmediye meydanında bir bâb menzilde sâkin iken bundan akdem vefât eden Plevne ahâlisinden el-Hâc Sudi Efendi b. Salih’in sulbî sagīr oğlu Salih Molla’nın vakt-i rüşd ü sedâdına değin tesviye-i umûruna kıbel-i şer‘den bir vasî nasbı lâzım ve mühim olmağın emîne ve müstakīme ve her vechile vesâyet uhdesinden gelmeğe kādire idiği zeyl-i kitâbda muharrerü’l-esâmî Müslimîn haberleriyle zâhir ve mütehakkık olan sagīr-i mezbûrun vâlidesi olup mahalle-i mezbûrede sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emine İfakat Hanım bt. İsmail Ragıb sagīr-i mezbûrun vakt-i rüşd ü sedâdına değin tesvi[ye]-i umûruna kıbel-i şer‘den vasî ve üzerine dahi sagīr-i mezbûrun min-kıbeli’l-üm ceddesi zâtı mu‘arrefe Hasibe Hanım nâzır nasb ü ta‘yîn olunduklarında anlar dahi vesâyet ve nezâret-i mezkûreleri kabûl ve hizmet-i lâzımelerini kemâ-yenbagī edâya ta‘ahhüd ve iltizâm eylediklerini Mahkeme-i Teftîş-i Evkāf beytü’l-mâl kassâmı fazîletlü efendi inhâ etmeğin mâ-vaka‘a bi’t-taleb ketb olundu. Fî 18 Ramazan sene [1]300 Şühûd[ü’l-hâl]: Mehmed Ağa b. Mustafa, Ömer Ağa b. Kadri ve gayruhum.