Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 66 Hüküm no: 29 Orijinal metin no: [15-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Odacı Hamdi Efendi’nin vefatıyla küçük çocukları Mesud ve Ayşe’ye intikal eden ev ve bahçe hisselerinin satışına izin verilmesi Salih, izin: 1 kıt‘a Numara: 209, 120 guruş Mahmiye-i İstanbul’da Samatya kurbünde Bâyezid-i Cedîd mahallesinde sâkin iken bundan akdem vefât eden Odacı Hamdi Efendi’nin sulbî sagīr oğlu Mesud ve sulbiye sagīre kızı Âişe’nin vâlideleri ve tesviye-i emirlerine bâ-hüccet-i şer‘iye vasîyy-i mansûbeleri olup hâlâ Gelibolu’da sâkine Ümmügülsüm İfakat Hanım bt. Mehmed tarafından husûs-ı âtîde bâ-hüccet-i şer‘iye vekîli işbu bâ‘isü’l-kitâb Emti‘a-i Ecnebiye Rüsûmât hademesinden Âgâh Efendi b. Abdullah m. bi’l-vekâle takrîr-i kelâm ve ta‘bîr ani’l-merâm edüp Şah Sultan Câmi‘-i şerîfinde Fatıma Hatun rûhu içün vaz‘ olunan eczâ-i şerîfe vakfına şehriye altmış akçe ve süvârî başhalîfesi Bakizâde el-Hâc İsmail Efendi Vakfı’na şehriye otuz akçe icâre-i müeccelelü vakfeyn-i mezkûreyn musakkafâtından zikr olunan Samatya caddesinde vâki‘ doksan iki numara ile murakkam ma‘lûmü’l-hudûd ve’l-müştemilât bir bâb menzil ve bağçenin nısf hisse-i şâyi‘ası sagīrân-ı mezbûrânın iki kıt‘a sened-i hâkānî ile bi’l-icâreteyn taht-ı tasarruflarında olup lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın nısf hisse-i şâyi‘a-i mezkûreleri bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye ser-mühendisliği taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın nısf hisse-i şâyi‘a-i mezkûreleri bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla sekiz bin guruş mukābelesinde bâ-re’y-i mütevellî âhara ferâğa izin taleb şüd. Fî 8 Za sene [1]300 Şühûdü’l-hâl: Mehmed Ağa b. Mustafa, Kısmet muhzırlarından Şevki Ağa b. Ahmed ve gayruhum.