Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 67 Hüküm no: 30 Orijinal metin no: [16-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin Ağa’nın vefatıyla küçük kızı Hacer’e intikal eden ev hissesinin satışına izin verilmesi Nazmi, izin: 1 kıt‘a Numara: 158, 22,5 guruş Mahrûse-i Galata’ya muzâfe kasaba-i Kasımpaşa’da Seyyid Ali Çelebi mahallesinde sâkin iken bundan akdem vefât [eden] Emin Ağa b. Süleyman’ın sulbiye sagīre kızı Hacer’in vâlidesi ve tesviye-i umûruna bâ-hüccet-i şer‘iye vasîyy-i mansûbesi zâtı ta‘rîf-i şer‘î ile mu‘arrefe işbu bâ‘isetü’l-kitâb Şerife Âişe Hanım bt. Mustafa m. bi’l-vesâye takrîr-i kelâm ve ta‘bîr ani’l-merâm edüp merhûm Seyyid Ali Çelebi Vakfı musakkafâtından kasaba-i mezbûrede Dutdibi sokağında otuz üç numara ile murakkam ma‘lûmü’l-hudûd ve’l-müştemilât beher şehr otuz akçe icâre-i müeccelelü bir bâb menzilin nısf hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīre-i mezbûreye hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīre-i mezbûre hakkında muzır ve gayr-ı müfîd olduğundan mâ‘adâ sagīre-i mezbûrenin nafaka ve kisveye eşedd-i ihtiyâcı olmağla sagīre-i mezbûrenin menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i mezbûre hakkında her vechile enfa‘ olduğuna binâen işbu yedimde olup hâlâ kasaba-i mezbûre kādısı fazîletlü Ahmet Bahâî Efendi ile Altıncı Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīre-i mezbûrenin menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla bin beş yüz guruş mukābelesinde âhara ferâğa izin taleb şüd. Fî 28 Şevvâl sene [1]300 Şühûdü’l-hâl: Abdülvahid Ağa b. Mehmed ve Mehmed Ağa b. Mustafa ve gayruhum. Derûn-ı hüccetde bast üu beyân olunduğu üzere vasîyy-i mezbûre Şerife Âişe Hanım kızı sagīre-i mezbûrenin menzil-i mezkûrda olan hisse-i şâyi‘ası bedel-i misli idiği mütehakkık olan lira-yı Osmânî yüz guruş hesâbıyla bin beş yüz guruş mukābelesinde el-Hâc Abdülvahid Ağa b. Mehmed’e ol dahi der-akab meblağ-ı merkūm mukābelesinde vasîyy-i mezbûreye ba‘de’l-ferâğ vasîyy-i mezbûre Şerife Âişe Hanım kızı sagīre-i mezbûrenin mâlından ve li-ecli’l-idâne vasî nasb olunan el-Hâc Abdülvahid Ağa yedinden istidâne ve kabz eylediği lira-yı Osmânî yüz guruş hesâbıyla menzil-i mezkûru sagīre-i mezbûreye vefâen ferâğ edeceğinden ol-vechile ferâğı icrâ ve sened-i hâkānîsi i‘tâ olunmak işbu mahalle şerh verildi.