Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 68 Hüküm no: 31 Orijinal metin no: [17-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi’nin, üvey kızkardeşi Âlime Hanım’dan kendisine intikal eden ev ve dükkân hisselerine el koyan Ali Efendi’den hisselerini almak istemesi Salih, isbât-ı vekâlet: 2 kıt‘a Numara: 155, 40 guruş Konya vilâyeti dâhilinde Niğde sancağına tâbi‘ Ürgüp kazâsında Yunak mahallesinde sâkine Âlime Hanım bt. Hüseyin b. Abdullah’ın li-ümmin er karındaşı olup tarafından ber-vech-i âtî vekâlet iddi‘â eden işbu bâ‘isü’l-kitâb el-Hâc Ali Efendi b. Ahmed m. zikri âtî menzil hissesine bi’l-emâne vaz‘-ı yedi mütehakkık olan Sultan Ahmed Han Câmi‘-i şerîfi müezzinlerinden es-Seyyid Ali Efendi b. Osman mahzarında üzerine da‘vâ ve takrîr-i kelâm edip cennet-mekân Gāzi Sultan Mahmud Hân-ı sânî hazretleri Evkāf-ı celîleleri mülhakātından Hançerli Fatıma Sultan Vakfı musakkafâtından mahmiye-i İstanbul’da Küçükayasofya kurbünde Demirci sokağında vâki‘ el-yevm bir numara ile murakkam ma‘lûmü’l-hudûd ve’l-müştemilât şehriye altmış akçe icâre-i müeccelelü el-hâletü hâzihî bir bâb menzilin nısf hissesiyle merhûm Abidin Ağa Vakfı musakkafâtından Aksaray kurbünde Horhor’da Kızılminâre mahallesinde vâki‘ altmış sekiz ve yetmiş numaralar ile murakkam birbirine muttasıl şehriye altmış akçe icâre-i müeccelelü iki bâb dükkânın müstakili vâlidem müteveffât Hâce Fatıma Hatun bt. Hasan’[a]intikālinden benimle kız karındaşım gāibe-i mezbûre Âlime Hanım ve li-ebin er karındaşım Saray-ı Hümâyûn hâs ve harcî fırın kâtib-i sâbık müteveffâ Mehmed Efendi’nin hayatında âdiyen bi’l-icâreteyn taht-ı tasarrufumuzda olduğu hâlde karındaşım mûmâ-ileyh Mehmed Efendi’nin fevtiyle nısf menzil ve müstakil dükkân-ı mezkûrlardan sülüs hisseleri sulbî kebîr oğlu Mehmed Haşim Bey ve sulbiye kebîre kızı Sabiha Hanım ve sulbî sagīr oğulları İsmail Hakkı ve Ahmed Muhtâr Beylere hasbe’l-âde intikāl edüp mezbûr Ali Efendi nısf hisse menzil ve müstakil dükkân-ı mezkûrlardan kız karındaşım gāibe-i mezbûrenin sülüs hisselerine teslîmiyle bi’l-emâne vâzı‘ü’l-yed olup ancak kız karındaşım gāibe-i mezbûre ber-vech-i muharrer mutasarrıfa olduğu hisse-i mezkûrelerini mezbûr Ali Efendi yedinden nez‘ ü kabza ve ba‘de’l-kabz bedel-i misilleri ve mütevellîleri re’yleriyle âhara ferâğa ve bedellerini ahz ü kabza ve makbûzumu kendüye irsâl ve îsâle ve lede’l-iktizâ sulh ve ibrâya ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Şa‘bâni’l-mu‘azzamının on yedinci günü târihiyle müverraha kazâ-i mezkûre nâibi es-Seyyid Abdülkerim Şem‘î Efendi’nin imzâ ve hâtemini hâviye bir kıt‘a vekâlet hücceti ve hüccet-i mezkûre zahrında muharrer Konya Vilâyeti Bidâyet Mahkemesi’nin memhûr mazbatası mantûklarınca zikr olunan Ürgüp Mahkemesi’nde beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i mezkûrelerden keff-i yed ve vech-i lâyıkıyla bana teslîme mezbûr Ali Efendi’ye tenbîh olunmak murâdımdır dedikde gıbbe’s-suâl mezbûr es-Seyyid Ali Efendi dahi cevâbında hisse-i mezkûreleri gāibe-i mezbûrenin ber-vech-i muharrer intikālen tasarrufunda olup kendüsü dahi teslîmiyle bi’l-emâne vâzı‘ü’l-yed olduğunu ikrâr mâ‘adâ müdde‘î-i mezbûrun vekâlet müdde‘âsını inkâr etmekle hüccet ve mazbata-i mezkûreler mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâneden tahşiye ve temhîr kılındığına ve me‘âli vekîl-i mezbûrun takrîr-i meşrûhuna muvâfık ve mazbata-i mezkûre dahi mazmûn-ı hüccet-i mezkûreyi musaddık bulunduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince hisse-i mezkûrelerden keff-i yed ve müdde‘î vekîl-i mezbûr el-Hâc Ali Efendi’ye vech-i lâyıkıyla teslîme mezbûr es-Seyyid Ali Efendi’ye tenbîh olunmağın mâ-vaka‘a bi’t-taleb ketb şüd. Fî 24 Şevvâl sene [1]300 Şühûdü’l-hâl: Muhzır Mehmed Ağa b. Mustafa, Muhzırbaşı Ömer Ağa b. Kadri ve gayruhum.