Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 70 Hüküm no: 32 Orijinal metin no: [18-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şile’de orman memuru olan Hüseyin Efendi’nin vefatıyla küçük çocukları Mehmed Şefik ve Hatice Kübra’ya intikal eden evlerin satışına izin verilmesi Nazmi, izin: 1 kıt‘a Numara: 159, 154,5 guruş Mahrûse-i Galata’ya muzâfe kasaba-i Kasımpaşa’da Kādı mahallesi ahâlisinden olup sevâhil-i Bahr-ı siyâhda Şile kazâsında orman memûru iken vefât eden Hüseyin Efendi b. Ali’nin sulbî sagīr oğlu Mehmed Şefik ve sulbiye sagīre kızı Hadice Kübra’nın vâlideleri ve tesviye-i emrlerine bâ-hüccet-i şer‘iye vasîyy-i mansûbeleri zâtı ta‘rîf-i şer‘î ile mu‘arrefe olan işbu bâ‘isetü’l-kitâb Emine Halide Hanım bt. Abdullah m. bi’l-vesâye takrîr-i kelâm edüp merhûm Hasan Kethudâ Vakfı musakkafâtından mahmiye-i mezbûrede Kapan-ı Dakīk kurbünde Hızır Bey mahallesinde Fabrika sokağında üç numara ile murakkam ma‘lûmü’l-hudûd ve’l-müştemilât şehriye altmış akçe icâre-i müeccelelü bir bâb menzil müteveffâ-yı mezbûrun hayatında bâ-temessükât-ı mütevellî bi’l-icâreteyn taht-ı tasarrufunda olup ba‘de vefâtihî sagīrân-ı mezbûrâna hasbe’l-âde münâsafeten intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı müfîd olduğundan mâ‘adâ sagīrân-ı mezbûrânın nafaka ve kisveye dahi eşedd-i ihtiyâçları olmağla sagīrân-ı mezbûrânın menzil-i mezkûru bedel-i misliyle bâ-re’y-i mütevellî âhara ferâğ ve bedeli ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup mahrûse-i mezkûre kādısı fazîletlü Ahmed Bahâî Efendi ile Birinci Dâire-i Belediye taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûru bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on bin guruş mukābelesinde bâ-re’y-i mütevellî âhara ferâğa izin taleb şüd. Fî 19 Şevvâl sene 1300 Şühûdü’l-hâl: Mehmed Ağa b. Mustafa, Abdülvahid Ağa b. Mehmed ve gayruhum. Derûn-ı hüccetde bast ü beyân olunduğu üzere vasîyy-i mezbûre Emine Halide Hanım sagīrân-ı mezbûrânın menzil-i mezkûrunu bedel-i misli idiği mütehakkık olan lira-yı Osmânî yüz guruş hesâbıyla on bin guruş mukābelesinde Abdülvahid Ağa b. Mehmed’e ol dahi der‘ akab meblağ-ı merkūm mukābelesinde vasîyy-i mezbûre Emine Halide Hanım’a ba‘de’l-ferâğ vasîyy-i mezbûre sagīrân-ı mezbûrânın mâlından ve li-ecli’l-idâne vasî nasb olunan mezbûr Abdülvahid Ağa yedinden istidâne ve kabz eylediği lira-yı Osmânî yüz guruş hesâbıyla on bin guruş mukābelesinde sagīrân-ı mezbûrâna vefâen ferâğ edeceğinden ol-vechile ferâğı icrâ ve sened-i hâkānî i‘tâ olunmak üzere işbu mahalle şerh verildi.