Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 112 Hüküm no: 38 Orijinal metin no: [5b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali b. Abdullah’ın alacağını kefil Musa Beşe b. Süleyman’dan sulh yoluyla aldığı Mellâh tâifesinden Ali b. Abdullah nâm kimesne meclis-i şer‘-i şerîf-i lâzımü’t-teşrîfde Musa Beşe b. Süleyman mahzarında ikrâr bundan akdem mezbûr Musa Beşe’den gāibe ani’l-meclis şahsı ma‘lûmumuz Âişe Hâtun zimmetinde yedinden müşterâ ve makbûz açık kaşlı, elâ gözlü, Rûsiyyetü’l-asl Marya ta‘bîr olunur câriye bahâsından hakkım olan otuz beş kıt‘a esedî guruşa kefîl olmuşidin deyû da‘vâ eylediğimde ol dahi inkâr etmeğin beynimizde münâza‘ât-ı kesîre vukū‘undan sonra muslihûn tavassut edip mezbûr Musa Beşe ile beynimizde yirmi esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr yirmi esedî guruşu mezbûr Musa Beşe yedinden tamâmen ahz u kabz edip husûs-ı mezbûra müte‘allika âmme-i da‘vâ ve mütâlebâtdan mezbûr Musa Beşe’nin zimmetini ibrâ eyledim dedikde gıbbe’t-tasdîki’l-mu‘teber mâ vaka‘a bi’t-taleb ketb olundu. Fi’l-yevmi’l-ışrîn min Rebî‘ilâhir li sene seb‘a ve seb‘în ve elf. Şuhûdü’l-hâl: Mehmed Ağa b. ( ) Ser-habbâzân, Esirci Kara Mehmed, Mustafa b. ( ), el-Hâc İsmail b. Hüseyin, Ali Çelebi b. Mehmed, Osman b. Süleyman.