Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 71 Hüküm no: 33 Orijinal metin no: [18-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asâkir-i bahriye feriklerinden Eyüb Ârif Paşa’nın vefatıyla küçük çocukları Ali Fuad ve Mehmed Mazhar’a intikal eden ev hisselerinin satışına izin verilmesi İsmail Hakkı, izin: 1 kıt‘a Numara: 100, 468 guruş Mahmiye-i İstanbul’da Âşıkpaşa mahallesinde sâkin iken bundan akdem vefât eden asâkir-i bahriye ferîkānından mütekā‘id Eyüb Ârif Paşa b. Mehmed Salih’in sulbî sagīr mahdûmları Ali Fuad ve Mehmed Mazhar Beylerin vâlideleri ve tesviye-i emrlerine bâ-hüccet-i şer‘iye vasiyye-i mansûbeleri olup zâtı ta‘rîf-i şer‘î ile mu‘arrefe olan işbu bâ‘isetü’l-kitâb Fâtımatü’z-zehra Hanım bt. İbrahim Edhem m. bi’l-vesâye takrîr-i kelâm ve ta‘bîr ani’l-merâm edüp Haremeyn-i Şerîfeyn -şerrefehumullâhu te‘âlâ fi’d-dâreyn- Vakfı’na şehriye beş akçe ve silahdârî-i esbak Bağçevânzâde Merhûm el-Hâc Mehmed Ağa Vakfı’na şehriye on akçe ve merhûme Rabia Hatun bt. Velizâde Mehmed Efendi Vakfı’na şehriye beş akçe ve Şeyhülislâm-ı esbak merhûm Abdullah Efendi kerîmesi merhûme Hadice Hanım Vakfı’na dört kıt‘a temessükle şehriye cem‘an iki yüz on akçe icâre-i müeccelelü evkāf-ı mezkûre musakkafâtından mahalle-i mezkûrede Kasabbaşı Çeşmesi sokağında vâki‘ mukaddemâ arsa ve ahur ve bağçe el-yevm beş numara ile murakkam ma‘lûmü’l-hudûd ve’l-müştemilât bir bâb menzil müteveffâ-yı mezbûrun hayatında bi’l-icâreteyn taht-ı tasarrufunda olup ba‘de vefâtihî sagīrân-ı mezbûrân ile sulbî kebîr mahdûmları Salih Rıfkı ve İsmail Âtıf ve Mehmed Nureddin [19] Beylere hasbe’l-âde ihmâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīrân-ı mezbûrân haklarında muzır ve gayr-ı nâfi‘ olduğundan mâ‘adâ sagīrân-ı mezbûrânın mâlları kalîl olup nafaka ve kisveye dahi eşedd-i ihtiyâçları olmağla sagīrân-ı mezbûrânın menzil-i mezkûrda olan iki humus hisse-i şâyi‘aları bedel-i misli ve mütevellîleri re’yleriyle âhara ferâğ ve bedeli ahz ü kabz birle i‘mâl ve istirbâh olunup hâsıl olan ribhiyle infâk ve iksâ olunmak sagīrân-ı mezbûrân haklarında her vechile enfa‘ ve evlâ olduğuna binâen işbu yedimde olup hâlâ kassâm-ı askerî fazîletlü Mehmed Emin Efendi ile İkinci Dâire-i Belediye ser-mühendisliği taraflarından i‘tâ olunan memhûr bir kıt‘a tahmîn-i bedel pusulası mantûkunca sagīrân-ı mezbûrânın menzil-i mezkûrda olan iki humus hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla yirmi dokuz bin dört yüz guruş ve nef‘an li’s-sagīrân zam olunan bin sekiz yüz guruş ki cem‘an otuz bir bin iki yüz guruş mukābelesinde âhara ferâğa izin taleb şüd. Fî 11 Ramazan sene [1]300 Şühûdü’l-hâl: el-Hâc Rıza Ağa b. Ali, Mehmed Ağa b. Hasan ve gayruhum.