Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 79 Hüküm no: 41 Orijinal metin no: [24-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nazife Hanım’ın oda ve gedik âletleri hissesine el koyan Şerif Efendi’den hissenin alınması Konya vilâyeti dâhilinde Hamid sancağına tâbi‘ Eğridir kazâsına mülhak Barla nâhiyesinde sâkine Hafız Hüseyin Efendi zevcesi Nazife Hanım bt. İmâmzâde İbrahim Ağa b. Abdullah tarafından ber-vech-i âtî vekâlet iddi‘â eden yağlıkçı esnâfından Mehmed Efendi b. el-Hâc Hüseyin m. zikri âtî oda ve gedik âlâtı hisselerine bi’l-emâne vaz‘-ı yedi mütehakkık olan Adliye Nezâreti Evrâk Odası ketebesinden Şerif Efendi b. İbrahim mahzarında ikrâr ve takrîr-i kelâm edüp nezâret-i Evkāf-ı Hümâyûn’a mülhak evkāfdan merhûm Cağalzâde Rüstempaşa Vakfı musakkafâtından mahmiye-i İstanbul’da Çarşı-yı Kebîr’de Bâtpazarı kurbünde Kebeciler Hanı demekle ma‘rûf hanın tahtânîsinde kâin şehriye yetmiş beş akçe icâre-i müeccelelü ber-mûceb-i temessük otuz dokuz numara ile murakkam bir bâb odanın iki kıt‘a temessükle on hisse i‘tibârıyla bir hissesi ve yine Çarşı-yı Kebîr’de Evliyâ Câmi‘-i şerîfinden Dua meydanına gider iken cânib-i yemîninde yüz altmış altı numara ile murakkam bir bâb yağlıkçı dükkânı derûnunda mevcûde Haremeyn-i Muhteremeyn Evkāfı müstegallâtından yevmî bir akçe icâre-i müeccelelü gedik ta‘bîr olunur âlât-ı lâzıme-i ma‘lûmenin iki kıt‘a temessük mantûklarınca kezâlik on hisse i‘tibârıyla bir hissesi ve zikr olunan Kebeciler Hanı kapısı ittisâlinde kâin yüz dört numara ile murakkam bir bâb astarcı dükkânı derûnunda mevcûde cennet-mekân Sultan Mahmud Hân-ı sânî -tâbe serâhû- hazretlerinin evkāf-ı şerîfeleri müstegallâtından yevmî altı akçe icâre-i müeccelelü gedik ta‘bîr olunur âlât-ı lâzıme-i ma‘lûmenin dahi on sekiz sehm i‘tibârıyla kezâlik bir sehm hisse-i şâyi‘ası vâlidesi müteveffât Rukiye Hanım bt. el-Hâc İsmail intikālinden gāibe-i mezbûre ile li-ebeveyn er karındaşı gāib ani’l-meclis el-Hâc Burhan Ağa’nın âdiyen bi’l-icâreteyn münâsafeten iştirâken ve şâyi‘an taht-ı tasarruflarında ve mezbûr Şerif Efendi gāibe-i mezbûrenin hisse-i şâyi‘a-i mezkûrelerin teslîmiyle bi’l-emâne vâzı‘ü’l-yed olup ancak gāibe-i mezbûre ber-vech-i muharrer mutasarrıfa olduğu hisse-i şâyi‘a-i mezkûrelerini mezbûrun yedinden nez‘ ve kabza ve ba‘de’l-kabz mahâllinde makbûzu olan bin altı yüz guruş bedel mukābelesinde gāib ani’l-meclis el-Hâc Hüseyin Efendi b. İsmail’e ferâğını huzûr-ı mütevellîde takrîre ve husûs-ı mezkûr mütevakkıf olduğu umûrun küllîsine yedimde olup işbu sene-i mübâreke Saferi’l-hayrının yedinci günü târihiyle müverraha Eğridir kazâsı nâibi es-Seyyid İbrahim Necati Efendi’nin imzâ ve hâtemini hâviye bir kıt‘a vekâlet hücceti ve zahrında muharrer kazâ-i mezkûr Bidâyet Mahkemesi’nin memhûr mazbatası mantûklarınca mahkeme-i mezkûrede nâib-i mûmâ-ileyh huzûrunda tarafından beni gıyâbımda kabûlüme mevkūfe vekâlet-i mutlaka-i sahîha-i şer‘iye ile vekîl nasb ü ta‘yîn edüp haber-i vekâlet bana vâsıl oldukda ben dahi vekâlet-i mezkûreyi kabûl etmemle suâl olunup hisse-i şâyi‘a-i mezkûrelerden keff-i yed ve bana teslîme mezbûr Şerif Efendi’ye tenbîh olunmak bi’l-vekâle matlûbumdur dedikde gıbbe’s-suâl ol dahi cevâbında hisse-i şâyi‘a-i mezkûreler gāibe-i mezbûrenin ber-minvâl-i muharrer intikālen tasarrufunda olup kendüsü dahi bi’l-emâne vâzı‘ü’l-yed olduğunu ikrâr mâ‘adâ müdde‘î-i mezbûrun vekâlet müdde‘âsını inkâr etmekle zikr olunan hüccet ve mazbata mütâla‘a olundukda hüccet-i mezkûrenin mührü mutâbık ve me‘âli vekâlet-i mezkûreyi beyândan ibâret idiği cânib-i fetvâhâne-i celîleden tahşiye ve tahrîr olunduğuna ve mazmûnu müdde‘î vekîl-i mezbûrun takrîr-i meşrûhuna muvâfık ve mazbata-i mezkûre dahi hüccet-i mezkûreyi musaddık bulunduğuna binâen hüccet-i mezkûrenin tezvîr ve tasnî‘den sâlim olduğu münfehim ve Mecelle-i Ahkâm-ı Adliye’nin bin sekiz yüz yirmi birinci mâddesi mûcebince bu makūle tezvîr ve tasnî‘den sâlim olan senedât-ı şer‘iyenin mazmûnuyla bilâ-beyyine amel ve hüküm câiz olmağla mûcebince müdde‘î-i mezbûrun vekâletine ba‘de’l-hükm hisse-i mezkûrelerden keff-i yed ve müdde‘î [25] vekîl-i mezbûr Mehmed Efendi’ye teslîme mezbûr Şerif Efendi’ye tenbîh olunmağın mâ-vaka‘a bi’t-taleb ketb olundu. Fî 15 Zilka‘de sene [1]300 Şühûd[ü’l-hâl]: ( )