Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 80 Hüküm no: 42 Orijinal metin no: [25-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Antonik’in ölümüyle küçük kızı Tekohi’ye intikal eden ev ve arsa hissesinin satışına izin verilmesi Küçük İbrahim, izin: 1 kıt‘a Numara: 229, 51 guruş Mahmiye-i İstanbul’da Samatya kurbünde Mirâhor İlyas Bey mahallesinde Samatya caddesinde sâkin iken bundan akdem fevt olan Devlet-i Aliyye teba‘asının Ermeni Katolik milletinden Kuyumcu Antonik v. Tekhor’un sulbiye sagīre kızı Tekohi’nin vâlidesi ve tesviye-i umûruna bâ-hüccet-i şer‘iye vasîyy-i mansûbesi teba‘a-i Devlet-i Aliyye’nin millet-i merkūmesi nisvânından mu‘arrefetü’ş-şahs işbu bâ‘isetü’s-sifr Pirone bt. Kirkor m. bi’l-vesâye takrîr-i kelâm edüp nezâret-i Haremeyn-i Muhteremeyn’e mülhak evkāfdan kasablar kethudâsı el-Hâc Halil Ağa Vakfı musakkafâtından mahalle-i mezkûrede vâki‘ üç yüz kırk dokuz numara ile murakkam ma‘lûmü’l-hudûd ve’l-müştemilât iki kıt‘a temessük mantûkunca şehriye yirmi beş akçe icâre-i müeccelelü bir bâb menzil ve merhûme Hanife Hatun Vakfı musakkafâtından Koca Mustafa Paşa mahallesinde leblebici köşesinde ve sokağında vâki‘ yetmiş üç numara ile murakkam şehriye altmış akçe icâre-i müeccelelü bir kıt‘a muhterik menzil arsasından her biri müteveffâ-yı merkūmun sağlığında bâ-temessükât-ı mütevellî bi’l-icâreteyn taht-ı tasarrufunda olup ba‘de fevtihî sagīre-i merkūme ile sulbî kebîr oğlu Kirkor ve sulbiye kebîre kızları Akabi? ve Sofya ve Uskuhi’ye hasbe’l-âde ihmâsen intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip ve arsa-i mezkûre dahi bî-hâsıl ve etrâfını muhît taş duvarları mürûr-ı eyyâm ile münhedim olarak enkāzı telef ve zâyi‘ olacağı zâhir ve bedîdâr olup ol-vechile bekāları sagīre-i mezbûre hakkında muzır ve gayr-ı müfîd olduğundan mâ‘adâ sagīre-i merkūmenin nafaka ve kisveye eşedd-i ihtiyâcı olmağla sagīre-i merkūmenin menzil ve arsa-i mezkûrlarda olan humus hisse-i şâyi‘aları bedel-i misilleri ve mütevellîleri re’yleriyle âhara ferâğ ve bedelleri ahz ü kabz birle i‘mâl ve istirbâh olunup hâsıl olan nemâsıyla infâk ve iksâ olunmak sagīre-i merkūme hakkında her vechile enfa‘ ve evlâ olduğuna binâen işbu yedimde olan hâlâ kassâm-ı askerî fazîletlü Mehmed Emin Efendi ile Üçüncü Dâire-i Belediye taraflarından i‘tâ olunan memhûr iki kıt‘a tahmîn-i bedel pusulası mantûkunca sagīre-i merkūmenin menzil ve arsa-i mezkûrelerde olan humus hisse-i şâyi‘aları bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla menzil-i mezkûrda olan humus hissesini üç bin guruş ve arsa-i mezkûrede olan humus hissesi dört yüz guruş ki cem‘an üç bin dört yüz guruş mukābelesinde âhara ferâğa izin taleb şüd. Fî 17 Zilka‘de sene [1]300 Şühûdü’l-hâl: Mehmed Ağa b. Mustafa, Salim Ağa b. Ömer ve gayruhum. Derûn-ı hüccetde bast ü beyân olunduğu üzere vasîyy-i merkūme Pirone ve sagīre-i merkūmenin ancak menzil-i mezkûrda olan humus [hisse-i] şâyi‘ası bedel-i misli idiği mütehakkık olan lira-yı Osmânî yüz guruş hesâbı üzere üç bin guruş mukābelesinde Muhzır Hasan Ağa b. Abdüllatif’e ol dahi der‘ akab meblağ-ı merkūm mukābelesinde vasîyy-i merkūmeye bâ-re’y-i mütevellî kat‘iyyen ba‘de’l-ferâğ vasîyy-i merkūme Pirone sagīre-i merkūme mâlından ve li-ecli’l-idâne vasî nasb olunan mezbûr Hasan Ağa yedinden istidâne ve kabz eylediği lira-yı Osmânî yüz guruş hesâbıyla üç bin ve def‘a dört yüz guruş ki cem‘an 3.400 guruş deyni mukābelesinde humus hisse-i şâyi‘a-i ma‘lûme ile diğer evlâdları kibâr-ı merkūmûn Kirkor ve Akabi ve Uskuhi’den tefevvüz eylediği üç humus hisse-i şâyi‘a ki cem‘an dört humus hisseyi sagīre-i merkūmeye bâ-re’y-i mütevellî vefâen ferâğ edeceğinden Senedât-ı Umûmiye İdâresi’nde ol-vechile ferâğı icrâ ve sened-i hâkānîleri i‘tâ olunmak üzere işbu mahalle şerh verildi.