Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 81 Hüküm no: 43 Orijinal metin no: [26-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın vefatıyla küçük oğlu İsmail Hakkı’ya intikal eden ev hissesinin satışına izin verilmesi Hocazâde Ali Rıza, izin: 1 kıt‘a Numara: 220, 240 guruş Galata’ya muzâfe kasaba-i Beşiktaş’a tâbi‘ Bebek nâm-ı diğer Hümâyûnâbad karyesinde bir bâb menzilde eşyâsı olup tebdîl-i hava zımnında İzmir cânibinde sâkin iken bundan akdem vefât eden Suriye kapıkethudâsı merhûm Tevfik Bey’in müdîr-i umûru Mehmed Ağa b. Ali’nin sulbî sagīr oğlu İsmail Hakkı’nın vâlidesi ve tesviye-i umûruna bâ-hüccet-i şer‘iye vasîyy-i mansûbesi <> zâtı ta‘rîf-i şer‘î ile mu‘arrefe işbu bâ‘isetü’l-kitâb Fatıma Melek Hanım bt. Mustafa m. bi’l-vesâye takrîr-i kelâm edüp Haremeyn-i Muhteremeyn Hazînesi’nden mazbût cennet-mekân Sultan Mahmud Hân-ı sânî -tâbe serâhû- Hazretleri Vakfı mülhakātından adn-âşiyân Sultan Ahmed Hân-ı sâlis Hazretleri Vakfı müsakkafâtından zikr olunan Bey karyesinde vâki‘ altmış altı numara ile murakkam ma‘lûmü’l-hudûd ve’l-müştemilât şehriye iki yüz altmış beş akçe icâre-i müeccelelü terbî‘an sekiz yüz kırk dokuz zirâ‘ arsada mebnî büyût-ı adîde ve terbî‘an bin beş yüz doksan dört buçuk zirâ‘ arsayı müştemil bir bâb menzilin nısf hisse-i şâyi‘ası müteveffâ-yı mezbûrun hayatında bâ-temessük-i mütevellî bi’l-icâreteyn taht-ı tasarrufunda olup ba‘de vefâtihî sagīr-i mezbûra hasbe’l-âde intikāl edüp lâkin menzil-i mezkûr ânen fe-ânen müşrif-i harâb olarak hâsılı harcına vefâ etmeyip bekāsı sagīr-i mezbûr hakkında muzır ve gayr-ı müfîd olduğundan mâ‘adâ sagīr-i mezbûrun nafaka ve kisveye dahi eşedd-i ihtiyâcı olmağla sagīr-i mezbûrun menzil-i mezkûrda olan nısf hisse-i şâyi‘ası bedel-i misliyle bâ-re’y-i mütevellî âhara ferâğ ve bedeli ahz ü kabz ve müteveffâ-yı mezbûrun Teftîş-i Evkāf Mahkemesi’nde tahrîr olunan terekesi defter-i kassâmına idhâl birle i‘mâl ve istirbâh olunup hâsıl olan ribhiyle infâk ve iksâ olunmak sagīr-i mezbûr hakkında her vechile enfa‘ ve evlâ olduğuna binâen işbu yedimde olup Dördüncü Dâire-i Belediye tarafından i‘tâ olunan memhûr bir kıt‘a tahmîn-i bedel pusulası mantûkunca sagīr-i mezbûrun menzil-i mezkûrda olan nısf hisse-i şâyi‘ası bundan akdem lede’l-müzâyede ve ba‘de’l-keşf el-yevm bedel-i misli idiği bi’l-ihbâr zâhir olan lira-yı Osmânî yüz guruş hesâbıyla on beş bin beş yüz elli guruş ve nef‘an li’l-yetîm zam olunan dört yüz elli guruş ki cem‘an on altı bin guruş bedel mukābelesinde bâ-re’y-i mütevellî âhara ferâğa izin taleb şüd. Fî 6 Zilka‘de sene 1300 Şühûdü’l-hâl: Muhzır Mehmed Ağa b. Mustafa, Münâdî Ahmed Ağa b. Hüseyin ve gayruhum.