Evkaf-ı Hümâyûn Mahkemesi 673 Numaralı Sicil (H. 1300-1301 / M. 1883-1884) cilt: 100, sayfa: 82 Hüküm no: 44 Orijinal metin no: [26-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şayeste Kadınefendi’nin başağalarından Mehmed Cavid Ağa’nın para vakfiyesi Mümeyyiz-i evvel Efendi Numara: 232, 166 guruş Mâ fîhi mine’l-vakfi ve’ş-şurût vaka‘a indî ale’n-nemati’l-mebsût hakemtü bi-sıhhatihî ve lüzûmihî fî-husûsihî ve umûmihî âlimen bi’l-hilâfi’l-cârî beyne’l-eimmeti’l-eslâf ve ene’l-fakīr ilâ alâ’i rabbihi zi’l-eltâf Gelenbevîzâde es-Seyyid Mahmud Aziz el-müfettiş li-umûri’l-evkāf -gufire lehümâ- El-hamdü lillâhi’l-vâkıfi alâ-küllî hâli’l-münezzeh ani’t-tagayyür ve’l-intikāl ve’s-salâtü ve’s-selâmü alâ-Muhammedini’l-mevsûf bi-mekârimi’l-ahlâk ve mehâsini’l-hisâl ve alâ-âlihî ve ashâbihi’l-âricîn ile’l-me‘ârici’l-kemâl ammâ ba‘d, işbu vakfiye-i sahîhatü’l-fehâvî ve vesîka-i şer‘iyetü’l-metâvînin tahrîr ü inşâ ve tastîr ü imlâsına bâ‘is ve bâdî oldur ki Hudâvendigâr-ı esbak cennet-mekân Sultan Abdülmecid Hân-ı Gāzi -tâbe serâhû- hazretlerinin zaman-ı saltanatlarında üçüncü ikbâlleri devletlü ismetlü Şayeste Kadınefendi hazretlerinin başağaları olup zikri âtî hayrâta taraf-ı saltanat-ı seniyyeden mezûn olan sâhibü’l-hayrât ve râgıbü’l-meberrât izzetlü fazîletlü Mehmed Cavid Ağa b. Abdullah b. Abdülmennan bu dâ‘îlerinin Galata’ya muzâfe Beşiktaş Sâhilsaray-ı Hümâyûnu’nda Harem-i Hümâyûn Agavâtı Evkāfı İdâresi heyetine mahsûs odada huzûr-ı Müslimînde akd eylediği meclis-i şer‘-i şerîf-i enver ve mahfil-i dîn-i münîf-i ezherde vakf-ı âti’l-beyâna li-ecli’t-tescîl mütevellî nasb ü ta‘yîn olunan agavât-ı mûmâ-ileyhim evkāfının bâ-hüccet-i şer‘iye mütevellîsi el-Hâc Mustafa Efendi b. Ahmed mahzarında ikrâr-ı sahîh-i şer‘î ve i‘tirâf-ı sarîh-i mer‘î edüp etyab mâlımdan ifrâz eylediğim sîm mecîdiye yirmi guruş hesâbıyla on bin beş yüz guruşu hasbeten lillâhi te‘âlâ vakf-ı sahîh-i müebbed ve habs-i sarîh-i muhalled ile vakf ü habsedüp şöyle şart ü ta‘yîn eyledim ki, meblağ-ı merkūm on bin beş yüz guruşu sâhilsaray-ı mezkûrda Saray-ı Cedîd başkapı gulâmı bulunanlar riyâsetlerinde olarak mukaddemâ teşkîl olunan heyet ma‘rifetiyle idâre olunan Harem-i Hümâyûn Agavâtı Nukūdu Sandığı’na vaz‘la heyet-i mezkûre [27] ma‘rifet ve nezâretiyle rehn-i kavî ve kefîl-i melî ve lede’l-hâce ikisinden biri ile bâ-yed-i mütevellî onu on bir buçuk hesâbı üzere bâ-devr-i şer‘î alâ-vechi’l-helâl istirbâh ve istiğlâl olunup hâsıl olan nemâsından beher sene şehr-i Rebî‘ülevvel’in on ikinci gününden sonra münâsib bir günde kutbü’l-ârifîn gavsü’l-muvassılîn merhûm Yahya Efendi Hazretlerinin türbe-i şerîfelerinde menba‘-ı zülâl-ı şefâ‘at melce-i usât-ı ümmet sultânü’l-enbiyâ burhânü’l-asfiyâ habîb-i hüdâ şefî‘-i rûz-ı cezâ a‘nî bihî Ebe’l-Kasım Muhammedini’l-Mustafâ aleyhi efdalü’s-salâti ve ekmelü’t-tahâyâ efendimiz hazretlerinin menkıbe-i müteberrike-i velâdet-i Nebeviyeleri kemâl-i huşû‘ ve hudû‘ ile kırâet ve esnâsında aşr-ı şerîf tilâvet ve huffâzdan bir kimesne şehr-i mezkûr hulûlünden mukaddem bed’ ile Kur’ân-ı Kerîmi hatm-i şerîf tertîbi üzere kırâet ederek akīb-i mevlid-i şerîfde hatm-i şerîf dahi itmâm olunup hâsıl olan ecr ü mesûbâtı evvelâ ravza-i mutahharalarına ve ba‘dehû âl ü evlâd ve ezvâc-ı tâhirât ve ashâb-ı kirâm hazerâtının ervâh-ı mukaddeselerine ve sâir cemî‘-i enbiyâ-i i‘zâm ve rusul-ı fihâm hazerâtının ervâh-ı tayyibelerine ve bi’l-cümle müminîn ve müminât ervâh-ı şerîfelerine ihdâ ve velî-ni‘met-i bî-minnetimiz velî-ni‘met-i âlem pâdişâhımız efendimiz hazretlerinin bi’l-yümn ve’l-ikbâl taht-ı âlî-baht-ı saltanatlarında bi’ş-şevketi ve’l-iclâl kemâl-i sıhhat ve âfiyetle bekāları ve hâlâ Dârü’s-saâdeti’ş-şerîfe ağası devletlü inâyetlü Hafız Behram Ağa hazretlerinin mesned-i âlîlerinde bi’s-sıhhati ve’l-âfiyedevamları ve benim dahi hayatda oldukça selâmet-i dâreynim içün duâ ve irtihâl-i dâr-ı bekā eylediğimde benim dahi rûhuma ihdâ olunup mukābelesinde nemâ-i mezkûrdan mevlidhân efendiye seksen guruş ve vâ‘iz ve du‘âcı efendiye elli guruş ve aşırhânlara taksîm olunmak içün seksen guruş ve hizmetde bulunanlara taksîm olunmak üzere yüz guruş ve hatm-i şerîf kırâeteden efendiye yüz guruş ve şeyh efendiye elli guruş ve dedegāna taksîm olunmak üzere seksen guruş ve fukarâya tasadduk olunmak içün elli guruş i‘tâ oluna ve kırk vakıyye elvân şeker ve yirmi beş vakıyye şerbetlik şeker iştirâ ve huzzâr-ı meclise tevzî‘ ve işrâb oluna ve elli beş guruş ile ûd ve gülâb iştirâ ve nakliye-i eşyâ mesârifi tesviye oluna ve senevî yüz guruş tevliyet vazîfesi ola ve tevliyet-i mezkûre hayatda oldukça nefsime ve dâr-ı bekāya irtihâl eylediğimde Harem-i Hümâyûn Agavâtı Evkāfı’na her kim mütevellî olur ise âna meşrûta ola ve Dârü’s-saâdeti’ş-şerîfe ağası bulunan zevât-ı kirâm vakf-ı mezkûruma hasbî nezâret buyuralar ve vakf-ı mezkûrumun beher sene muhâsebesi mütevellî ve Agavât Evkāfı Sandığı İdâresi heyeti ma‘rifetleriyle rü’yet olunup elli guruş harc-ı muhâsebe i‘tâ oluna ve mürûr-ı eyyâm ve kürûr-ı a‘vâm ile şerâit-i mezkûreye ri‘âyet müte‘azzire olur ise menâfi‘-i vakf mutlakā fukarâ-yı Müslimîne harc ü sarf oluna ve vakf-ı mezkûrumun tebdîl ü tağyîr ve taklîl ü teksîri merreten ba‘de uhrâ yedimde ve meşiyetimde ola deyü ta‘yîn-i şurût ve tebyîn-i kuyûd birle meblağ-ı merkūmu mütevellî-i mûmâ-ileyhe teslîm eylediğimde ol dahi tesellüm ve kabûl ve sâir mütevellîlerin evkāfda tasarrufları misillü tasarruf eyledi dedikde gıbbe’t-tasdîki’ş-şer‘î emr-i vakf tamam ve hâl-i teslîm encâm bulmuş iken vâkıf-ı mûmâ-ileyh butlân-ı vakf-ı nukūda ve zımnında olan şurût ve kuyûda ve ba‘dehû kavl-i adem-i lüzûma teşebbüs ile vakf-ı mezbûrdan rücû‘ ve meblağ-ı merkūmu ke’l-evvel istirdâda ve mütevellî-i mûmâ-ileyh dahi sıhhat ve lüzûmuna zâhib olan eimme-i dîn kavilleriyle mukābele ile red ve teslîmden ibâ ve imtinâ‘ ederek müterâfi‘ân ve herbiri mübtegāsınca fasl ü hasma tâlibân olduklarında bu dâ‘îleri dahi cânib-i vakfı evlâ ve teşyîd-i mebânî-i hayrı ahrâ görüp âlimen bi’l-hilâfi’l-cârî beyne’l-eimmeti’l-eslâf alâ-kavli men-yerâhu mine’l-eimmeti’l-müctehidîn -rıdvân[ullâhi] te‘âlâ aleyhim ecma‘în- vakf-ı mezkûrun evvelâ sıhhatine ve sâniyen lüzûmuna ve şurûtunun cevâzına hükm-i sahîh-i şer‘î ve kazâ-i sarîh-i mer‘î etmeğin vakf-ı mezbûre sahîh ve lâzım ve habs-i sarîh ve mütehattim olup nakz ü ibtâli muhâl ve tebdîl ü tağyîri vâkıf-ı mûmâ-ileyhimden gayra adîmü’l-ihtimâl oldu, cerâ zâlik ve, Hurrire fi’l-yevmi’s-sâlis ve’l-ışrîn min-Şa‘bâni’l-mu‘azzam li-sene selâse mi’e ve elf. Şühûd[ü’l-hâl]: Es-Seyyid Mustafa Fevzi Efendi b. İbrahim, Saray-ı Hümâyûn ser-kandilcisi Hüseyin Tevfik Ağa b. Abdulkadir, Mehmed Emin Efendi b. Abdullah, Muhzır refîki Mehmed Ağa b. Mustafa ve gayruhum.